Masalimo 98 - Chiyawo Bible

Mlungu Jwakulamula jwa cilambo cosope

Salimo.

¹ Mwajimbile AMBUJE* nyimbo ja sambano, pakuŵa atesile yindu yakusimonjeka! Ni mkono ŵawo wamlyo ni mkono ŵawo ŵawuswela, ŵapundile amagongo ŵawo.

² AMBUJE ŵasalile ŵandu kuti ajipundile ngondo, aliwonesye pameso pa ŵandu wosope kuti ali jwagoloka.

³ Acikumbucile cinonyelo cawo cangamala ni kukulupicika kwawo pa lukosyo lwa Isalaeli. Ŵandu ŵakumbesi kwa cilambo cosope capasi ŵaciweni cikulupusyo ca Mlungu jwetu.

⁴ Mwajimbile mwakusengwa AMBUJE, jemanja ŵa cilambo cosope capasi, mwajimbile mwakusengwa nyimbo sya malumbo.

⁵ Jimbani nyimbo syakwalumba AMBUJE ni cida cakwimbila ca ngonji, mgombe pangwe ni nyimbo syakunonyelesya.

⁶ Mjimbe nyimbo mwakulimbika ni malipenga ni yitolilo; mwajimbile mwakusengwa AMBUJE, ŵali mwenye.

⁷ Nyimbo jikukume pampepe ni yosope yayikutama mwelemo, cilambo cosope cijimbe pampepe ni ŵandu wosope ŵakutama mwelemo.

⁸ Sulo sikwate m'myala, ni matumbi gosope gajimbe mwakusengwa pameso pa AMBUJE,

⁹ pakuŵa akwisa kukulamula cilambo capasi. Tacilamula ŵandu ŵa ngosyo syosope mwakulungamika ni mwangali lusagu.