Masalimo 97 - Chiyawo Bible

Mlungu ali Jwakulamula Jwamkulungwa

¹ AMBUJE* ali mwenye, ŵandu ŵa pa cilambo capasi asangalale. Ŵandu wosope ŵa mumbali mwa nyasa asangalale.

² Mawunde ni cipi cacikulungwa yimsyungulile AMBUJE; akusalamulila mwakulungamika, ucimwene wakwe wangali lusagu.

³ Moto ukusalongolela msogolo mwakwe, ukwatinisya amagongo ŵakumsyungulila.

⁴ Kumesya kwa njasi syakwe sikulangusya cilambo cosope capasi, ŵandu wosope akusalola ni kutetemela.

⁵ Matumbi gakusanyelenyenduka mpela lipula pameso pawo AMBUJE; pameso pa AMBUJE ŵa cilambo cosope capasi.

⁶ Ya kwinani yikwenesya yakugoloka kwawo ŵandu ŵa mitundu josope akuluwona lumbili lwawo.

⁷ Ŵandu wosope ŵakujipopela milungu ja unami, ŵele ŵakusapocela yinyago akwatesya soni, pakuŵa kuti milungu josope jikusamjinamila AMBUJE.

⁸ Ŵandu ŵa ku Siyoni* akukondwa, misi ja ku Yuda nombe najo jikusangalala, ligongo lya yakuti pakulamula ŵalakwe AMBUJE.

⁹ Pakuŵa ŵalakwe AMBUJE, ali ŵamacili gosope, ŵakulamulila cilambo cosope capasi; Ŵalakwe ali ŵamacili kujipunda milungu jine jose.

¹⁰ AMBUJE akwanonyela ŵandu ŵakuyiŵenga yakusakala. Jwalakwe akuwusya umi wa ŵandu ŵakwe ŵaswela mtima. Akusiŵapokasya m'makono mwa ŵangalumbana.

¹¹ Lilanguka lyakwe likwaŵalila ŵandu ŵagoloka, ni ŵandu ŵambone mtima akusaŵa ŵakondwa.

¹² Msangalale mwa AMBUJE, jemanja ŵagoloka, mwatogolele pakulikolanga lina lyawo lyaliswela.