Masalimo 96 - Chiyawo Bible

Mlungu ali mwenye Jwamkulungwa

¹ Mwajimbile AMBUJE* nyimbo jasambano; Mwajimbile AMBUJE jemanja, ŵandu ŵa pa cilambo cosope capasi.

² Mwajimbile AMBUJE mlilumbe lina lyakwe, msalicisye ya cikulupusyo cakwe lisiku ni lisiku.

³ Jenesyani lumbili lwakwe kwa ŵandu ŵa ngosyo syosope, salicisyani ya masengo gakwe gakusimonjeka mwa ŵandu wosope.

⁴ Pakuŵa AMBUJE ali jwamkulungwa, akuŵajilwa kucimbicikwa mnope. Ŵandu akwenela kumjogopa kujipunda milungu josope.

⁵ Pakuŵa milungu josope ja ngosyo sya ŵandu jili yinyago, nambo AMBUJE ni juŵapanganyisye ya kwinani.

⁶ Lumbili ni ucimwene yili ni jwalakwe. Macili ni umbone yili m'malo gawo gamaswela.

⁷ Mumpe AMBUJE, jemanja ŵandu ŵa mitundu josope, mpelece kwa AMBUJE, lumbili ni macili.

⁸ Mpelece kwa AMBUJE lumbili lwa lina lyakwe, myice ni yakupeleka yenu ni kwinjila m'Nyumba jakwe.

⁹ Mumpopele AMBUJE mciwalaga yayiswela, tetemelani pameso pakwe, jemanja ŵandu ŵa cilambo capasi cosope.

¹⁰ Mjisalile mitundu ja ŵandu kuti, “AMBUJE ali mwenye! Elo, cilambo capasi ŵacilimbice, ngasicitenganyika kose; tacijilamula mitundu josope ja ŵandu mwagoloka.”

¹¹ Ya kwinani yisangalale, ni yapasi pano yisengwe; nyasa jikukume, ni yosope yayili mwelemo.

¹² Yosope yayili m'migunda yisangalale! Yitela yosope ya mu ukweti tiyicijimba mwakusengwa,

¹³ pameso pa AMBUJE, pakuŵa taciyika; kukulamula cilambo capasi. Tacalamula ŵandu wosope ŵa pa cilambo capasi mwakulupicika ni mwagoloka.