Masalimo 94 - Chiyawo Bible

Mlungu ali Jwakulamula jwa wosope

¹ Ŵalakwe AMBUJE,* ŵalakwe ali Mlungu jwakuwucisya mbusyo, akulosye kutumbila kwawo.

² Ajimuce ŵalakwe ŵakulamula cilambo capasi; ŵape ŵakulikwesya cacikwaŵajila.

³ Ŵangalumbana taŵe mkulikwesya mpaka cakaci, ŵalakwe AMBUJE?

⁴ Akusaŵeceta mwakulinyakula ni akusapocela yangalumbana yawo.

⁵ Akwajonanga ŵandu ŵenu, AMBUJE, akwasawusya ŵandu ŵenu ŵimwasagwile.

⁶ Akusiŵawulaga acakongwe ŵamasije* ni acalendo ŵakutama mcilambo mwawo, akusiŵawulaga soni ŵanace ŵamasije.

⁷ Ni akusati, “AMBUJE ngakuyiwona, Mlungu jwa Yakobo* ngakusamalila kose.”

⁸ Mpikanicisye ŵandu ŵakuloŵela mnope. Timcikola lunda cakaci?

⁹ Ana juŵapanganyisye mapikanilo, ngakupakombola kupikana? Ana ŵaŵapanganyisye meso, ngakupakombola kulola?

¹⁰ Ana ŵakusikalipila ngosyo sya ŵandu, ngapakombola kupeleka cilango? Nambi ŵele ŵakwajiganya ŵandu wosope ŵangali lunda?

¹¹ AMBUJE akusimanyilila nganisyo sya ŵandu kuti sili lipuje basi.

¹² Jwana upile mundu jwakumjamuka, ŵalakwe AMBUJE, soni jwakumjiganya ni malamusi gawo.

¹³ Akusampumusya ku masiku ga yisawusyo, mpaka jwangalumbana ali ajinjile mwilembe.

¹⁴ Pakuŵa AMBUJE ngasiŵajasa ŵandu ŵakwe; ngasiŵaleka jika ŵandu ŵawo ŵaŵasagwile.

¹⁵ Cilungamo ticiciwujila soni kwa ŵandu ŵaswela mtima. Wosope ŵagoloka mtima tacicikuya.

¹⁶ Ŵani ŵakusalimba mtima kuti asisyane ni ŵandu ŵangalumbana m'malo mwa une? Ŵani ŵakwimila mbali jangu, kuti asisyane ni ŵandu ŵa yitendo yangalumbana?

¹⁷ AMBUJE akaŵe ŵangangamucisya, ngaliji ndili mbwile.

¹⁸ Pinamanyilile kuti, “Lusajo lwangu lukutelesya,” cinonyelo cawo cangamala, ca ŵalakwe AMBUJE, cangamwile.

¹⁹ Pasikundupila nganisyo mu mtima mwangu, ŵalakwe akusawutulasya umi ŵangu ni kusangalasya.

²⁰ Ana yikomboleka kamulana ni ŵalakwe, ŵandu ŵakulamulila mwangalumbana, wakugapindisya malamusi gawo gagoloka?

²¹ Akusakamulana kuti ŵajonanje ŵandu ŵagoloka, ni akusalamula kuti jwangalemwa awulajidwe.

²² Nambo AMBUJE ali ŵakunjenjela ŵangu, AMBUJE ali lwala lwakutilila kwangu.

²³ Ni tacipeleka cilango ligongo lya ulemwa* wawo, tacajonanga ligongo lyakusakala kwawo, kusyene AMBUJE Mlungu jwetu tacajonanga jemanjajo.