Masalimo 92 - Chiyawo Bible

Nyimbo ja Malumbo

Salimo. Nyimbo ja pa sabato.

¹ Kuli kwambone kwatogolela AMBUJE,* kwimba nyimbo syakulilumba lina lyawo, Ŵalakwe Ŵakwinani Mnope;

² Kuli kwambone kundaŵi kulikose kwenesya ya cinonyelo cawo cangamala, ni cilo cilicose ya kulupicika kwawo,

³ pakwimba nyimbo syakusalala ni gitala, cing'wenyeng'wenye ni pangwe.

⁴ Masengo gawo gali gamakulungwa, ŵalakwe AMBUJE. Ngwimba mwakusengwa ligongo lya yindu yayitesile.

⁵ Masengo gawo gali gamakulungwa Ŵalakwe AMBUJE. Nganisyo syawo sili sya penani mnope.

⁶ Mundu jwangali lunda ngasasimanyilila, mundu jwakuloŵela ngakupakombola kuyipikanicisya yakuti.

⁷ Ŵandu ŵangalumbana akusipuka mpela manyasi, ni ŵandu ŵangalumbana yindu yawo yikwajendela cenene, nambo atamose yili myoyo tacijonasika kwa yaka yosope.

⁸ Ŵalakwe jika AMBUJE, ali ŵa penani mnope kundaŵi syosope.

⁹ Kusyene amagongo ŵawo ŵalakwe AMBUJE amagongo ŵawo tacijonasika, wosope ŵa yitendo yangalumbana tacipwilingana.

¹⁰ Nambo une animbisye mpela njati. Andaje ni mawuta gasambano.

¹¹ Meso gangu gakuweni konasika kwa amagongo ŵangu, mapikanilo gangu gapikene yakonasika kwa ŵandu ŵaŵanjimucile.

¹² Ŵandu ŵagoloka yindu yikusiyajendela cenene mpela yitela yamgwalangwa, ni akusakula mpela yitela ya mikungusa ja ku Lebanoni.

¹³ Jemanjajo ali mpela yitela yayipandile m'Nyumba ja AMBUJE, yayikutenjela Nyumba ja AMBUJE jwetu.

¹⁴ Yitelayi yikusasogola yisogosi atamose yicekulupe, ndaŵi syosope yikusaŵa yayiŵisi soni yakubiliŵita,

¹⁵ yikusalosya kuti AMBUJE ali ŵagoloka soni ali lwala lwangu, ni mwa ŵelewo mwangali cangalumbana.