Masalimo 91 - Chiyawo Bible

Mlungu ni jwakutucenjela jwetu

¹ Mundu jwakutilila kwa AMBUJE* kuti amcenjele, jwakutama mum'bwilili mwa Jwakwinani Mnope,

² tacisala kwa AMBUJE kuti, “Ŵalakwe ni kwakutilila kwangu ni ŵakunjenjela ŵangu. Ŵalakwe ali Mlungu jwangu jungusinakulupilila.”

³ Pakuŵa jwalakwe tacimkulupusya ku lwawu lwa jwakusakula soni ku yilwelele yakogoya.

⁴ Tacimbunicila ni mang'omba ga mapapiko gakwe, ni timcipata malo gakutilila m'mapapikomo. Kulupicika kwakwe tikutucenjele ni kutucinjilicisya.

⁵ Ngasimjogopa yakogoya yacilo, kapena mpamba ndaŵi ja musi,

⁶ ngasimjogopa soni mlili wakugwa cilo, kapena yakonanga umi musi.

⁷ Ŵandu 1,000 tawulajidwe pambali jenu, ni ŵandu 10,000 ku mkono wenu wamlyo; nambo yakogoyayo ngasiyimkwaya m'mwejo.

⁸ Timciyiwona ni meso genu, ni timcikuwona yakuti pakwawucisya mbusyo ŵandu ŵakutenda yakusakala.

⁹ Pakuŵa m'mwejo mwajiticisye AMBUJE kuŵa malo genu gakutilila, mwajiticisye Ŵakwinani Mnope kuti aŵe malo genu gakutama,

¹⁰ yakusakala ngasiyimgwila, atamose yakogoya ngasiyiyika ciŵandika ni nyumba jenu.

¹¹ Pakuŵa tacigalamulila malayika gawo kumlindilila m'mwejo, kumsunga m'mwejo m'matala genu gose.

¹² Tacimjangata m'makono gawo, kogopela kuti mtakuligombesya sajo syenu peganga.

¹³ Timciliŵata masimba ni majoka, kusyene timciliŵata ni lusajo lwenu mwanace jwa lisimba, ni soni cimjoka.

¹⁴ Pakuŵa mpundile kunonyela une tinjimkulupusya. Tinjimcenjela pakuŵa mkulimanyilila lina lyangu.

¹⁵ Pitacimbilanga, tinjijanga tinjitama najo pa ndaŵi ja yisawusyo. Tinjimpokasya ni kumcimbicisya.

¹⁶ Tinjimpa umi wawulewu ni kumkulupusya.