Masalimo 90 - Chiyawo Bible

BUKU JA MCECE (Masalimo 90—106) Ya Mlungu ni ŵandu

Lipopelo lwa Mose, mundu jwa Mlungu.

¹ AMBUJE,* ŵalakwe ni kwakutilila kwetu kwa yaka yosope.

² Mkanagapanganye matumbi, atamose mkanacipanganye cilambo ni pakutama ŵandu, ŵalakwe ali Mlungu kutandilila kwa yaka mpaka yaka yosope.

³ Ŵalakwe akumbucisya mundu ku luwundu, acitiji, “Ujanganani jemanja ŵanace ŵa ŵandu.”

⁴ Pakuŵa yaka macila likumi pameso pa ŵalakwe yili mpela lisiku limpepe yili mpela liso lyalipite kapena mpela cilo cacipite.

⁵ Ŵalakwe akusatyosya umi wa ŵandu mwacisisimucila. Ali mpela sagamisi ali mpela manyasi gagakusipuka kundaŵi.

⁶ Kundaŵiko gakusasipuka ni kutenjela, ligulo gakunyala ni kumula.

⁷ Pakuŵa uwe tutinice ligongo lya kutumbila kwawo, atujogoyisye ni ukali wawo.

⁸ Ayiŵisile yakulemwa yetu pameso pawo, atamose yakulemwa yetu yakusisika ayiŵisile pakulanguka.

⁹ Pakuŵa masiku getu gakusanondipa ligongo lyakutumbila kwawo, yaka yetu yikumala mpela kwisya kwa mtima.

¹⁰ Yaka ya umi wetu yikusakwana makumi msano ni gaŵili, kapena naga kola macili yaka makumi msano ni gatatu, nambo ndaŵi josope jikwamba kuŵa ja yisawusyo ni kulaga; yakayo ngayikukaŵa kumala, ni tukuwa.

¹¹ Ana ŵani ŵakumanyilila macili ga kutumbila kwawo? Ŵani ŵakumanyilila yakuyicisya yakwe ya ukali wawo?

¹² Myoyo atujiganye uwe kugaŵalanga masiku getu, kuti tuŵe ni mtima wa lunda.

¹³ Atusye mtima Ŵalakwe AMBUJE. Ana tatutumbilile mpaka cakaci? Ŵatendele canasa ŵakutumicila ŵawo.

¹⁴ Atugumbasye kundaŵi kulikose ni cinonyelo cawo cangamala, mwakuti tusecelele ni kusengwa masiku getu gosope.

¹⁵ Atusengwasye malinga ni masiku gamajinji gaŵatusawisye gala; ni yaka yejinji mpela yaka yitwatemi myisawusyo yila.

¹⁶ Akunde kuti masengo gawo gawonecele kwa ŵakutumicila ŵawo, ni macili gawo ga lumbili gawonece kwa ŵanace ŵawo.

¹⁷ Ŵalakwe AMBUJE Mlungu atusalalile mtima, ni kuyipa upile yosope yitukusatenda, elo, agape upile masengo ga yala yetu.