Masalimo 9 - Chiyawo Bible

Kumtogolela Mlungu ligongo lya cilungamo cakwe

Kwa jwakwimbisya nyimbo. Pakukuya wimbe wa nyimbo jakuti: Ciwa ca mwanace. Salimo ja Daudi.

¹ Tinjatogolela AMBUJE,* ni mtima wangu wosope; tinjasalila ŵandu ya yitendo yawo yosope yakusimonjesya.

² Tinjijimba mwa lukondwa ligongo lya ŵalakwe; tinjijimba nyimbo syakwalumba ŵalakwe ŵakwinani Mnope.

³ Kwamba kopocela ŵalakwe amagongo ŵangu akusatila, akusakuŵala ni kugwa, ni kuwila pameso pawo.

⁴ Pakuŵa ŵalakwe ambecetele magambo gangu, ŵalakwe atemi pa citengu kupeleka ulamusi wakulungamika.

⁵ Ŵalakwe ŵajijamwice mitundu ja ŵandu; ŵalakwe ŵajonasile ŵakusakala; taciliŵalicika kwa yaka yosope.

⁶ Amagongo ŵetu amasile, ajipaswile misinda jawo; ni ŵandu ngasajikumbucila soni.

⁷ Nambo AMBUJE akusatama pa citengu cawo kwa yaka yosope; Ŵaciŵicile cile citenguco kuti alamulileje.

⁸ Ni akucilamula cilambo capasi mwakulungamika, akwalamula ŵandu mwakulungamika.

⁹ Kwa AMBUJE ni kwakutilila ŵandu ŵali m'yisawusyo, soni kwakulupucila pa ndaŵi ja yipwetesi.

¹⁰ Ŵandu wakwamanyilila ŵalakwe AMBUJE, akusaŵika cikulupi cawo mwa ŵalakwe. Pakuŵa ŵalakwe AMBUJE, ngakwaleka ŵandu ŵakwasaka mnope ŵalakwe.

¹¹ Mwajimbile nyimbo sya malumbo AMBUJE, ŵakutama mu msinda wa Siyoni;* lalicilani masengo gakwe kwa ŵandu ŵa ngosyo syosope.

¹² Pakuŵa Mlungu akusiŵatendela canasa ŵandu ŵali m'yisawusyo. Akusakupikana kulila kwawo, ni akusapeleka cilango kwa ŵandu ŵakwasawusyawo.

¹³ Andendele canasa, ŵalakwe AMBUJE, akulole kulaga kwangu, kwakundendela ŵakumbenga une, Ŵalakwe akusangulupusya ku ciwa.

¹⁴ Kuti nipakombole kutogolela pa masengo gawo gosope, pasikati pa ŵandu ŵa mu Siyoni. Kusyene tinjiŵa jwakusengwa ligongo angulupwisye.

¹⁵ Ŵangakulupilila ŵagwilile mwisimbo liŵalisolele. Sajo syawo sitanjile mu lwawu luŵapanganyisye acimsyenepewo.

¹⁶ AMBUJE alimanyisye asyene kwa ŵandu wosope, mwakulamula kwawo kwa cilungamo; ŵangalumbanawo ŵatanjile mu yitendo yawo.

¹⁷ Ŵangalumbana tacijinjila kumalo ga ŵawe, ni wosope ŵakumkana Mlungu.

¹⁸ Pakuŵa ŵandu ŵakulaga, Mlungu ngakusiŵaliŵalila ndaŵi syosope, nipo cembeceyo ca ŵandu ŵakulaga ngasicijonasika kose.

¹⁹ Ajimuce, ŵalakwe AMBUJE, mundu akasiŵanyosya ŵalakwe ŵajimbe magambo ŵandu ŵangakulupilila.

²⁰ Ŵalakwe AMBUJE, ŵajogoye ŵele ŵanduwo; ŵandu ŵangakulupililawo amanyilile kuti jemanjajo ali ŵandu wamba.