Masalimo 89 - Chiyawo Bible

Nyimbo jakwimba pa ndaŵi jele cilambo cili pa yisawusyo

Ndakatulo ja Etani jwa lukosyo lwa Esala.

¹ Ŵalakwe AMBUJE, tinjijimba mwangalecesya nyimbo syakulumba cinonyelo cawo cangamala. Ni pakamwa pangu tinjijenesya ya kulupicika kwawo kwa yaka yosope.

² Pakuŵa cinonyelo cawo cangamala citamilicice kuti ciŵe mpaka yaka yosope, kulupicika kwawo kuli kwa citamile mpaka kwinani.

³ Ŵalakwe ŵatite, “Ndesile cilanga* ni mundu junamsagwile, lumbile kwa Daudi* jwakutumicila jwangu kuti.

⁴ ‘Yisukulu yenu tiyicitamilicika kwa yaka yosope. Tinjicisunjila cisukulu cilicose citengu cakwe ca ucimwene.’ ”

⁵ Yakwinani yikwalumba pa yindu yakusimonjeka ya ŵalakwe AMBUJE,* yikwalumba kukulupicika kwawo mu msongano ŵa ŵandu ŵaswela mtima.

⁶ Ana ŵani kwiwunde ŵampaka alandane ni AMBUJE? Nduni pasikati pa ŵakwinani ŵakulandana najo?

⁷ AMBUJE ni jwakwenela kumjogopa mu msongano ŵa ŵandu ŵaswela mtima, nijo jwamkulungwa ni jwakucimbicikwa pasikati pa wosope ŵakumsyungulila.

⁸ Ŵalakwe AMBUJE Mlungu Jwamaciligosope, ana ŵani ŵali ŵamacili mpela Ŵalakwe AMBUJE, wawo ŵali ŵakulupicika mu yosope?

⁹ Ŵalakwe akusalamulila Nyasa ja ukali. Matumbela gali gakwesile, ŵalakwe akusagatondoya.

¹⁰ Ŵalakwe ŵacikasile cilombo ca m'nyasa lina lyakwe Lahabu, kuŵa mtembo, ŵalakwe ŵapwilingenye amagongo ŵawo ni mkono wawo wamacili.

¹¹ Yakwinani yili yawo, cilambo capasi nombe naco cawo. Ŵacipanganyisye cilambo cosope ni yosope yayili mwelemo.

¹² Ŵapanganyisye kumpoto ni kum'mwela. Matumbi ga Taboli ni matumbi ga Helimoni gakwalumba ŵalakwe mwakondwa.

¹³ Ŵalakwe akwete macili gosope. Mkono wawo wana macili mnope, mkono wawo wamlyo uli wakupundanganya.

¹⁴ Cilungamo ni kulungama yili yilimbilimbi ya citengu cawo ca ucimwene, ŵalakwe akusalosya cinonyelo cangamala ni soni kukulupicika pa yosope yakutenda.

¹⁵ Ŵana upile ŵandu ŵakwalumba ŵalakwe ni nyimbo, ŵele ŵakwenda mcinonyelo ca ŵalakwe AMBUJE.

¹⁶ Jemanjajo akulicimbicisya lina lyawo lisiku lyosope; ni kukwesya goloka kwawo.

¹⁷ Pakuŵa ŵalakwe ali lumbili lwamacili getu; macili getu galimbile ligongo atusalalile mtima.

¹⁸ AMBUJE ali ŵakutucenjela ŵetu, kwa Ŵaswela ŵa Isalaeli ni ŵali mwenye ŵetu.

¹⁹ Kala ŵaŵecete musagamisi kwa ŵandu ŵawo ŵakulupicika, ŵatite, “Namwecice cisindi ca ucimwene jwali jwamacili, namkwesisye jwele junamkwesisye pasikati pa ŵandu.

²⁰ Namsimene Daudi, jwakutumicila jwangu; nampungulile ni mawuta gangu gamaswela.

²¹ Mkono wangu tuciŵa pa jwalakwe ndaŵi syosope. Mkono ŵangu soni tucimlimbisya.

²² Amagongo ngasampunda kose, ni ŵandu ŵakusakala ngasamtulusya.

²³ Tinjajonanga amagongo ŵakwe msyene ali mkulola; ni kwawulaga ŵandu ŵakumŵenga jwalakwe.

²⁴ Kukulupicika kwangu cinonyelo cangu cangamala tiyiciŵa ni jwalakwe tinjigalimbisya macili gakwe.

²⁵ Tinjiwukusya ucimwene wakwe kutyocela ku nyasa jajikulungwa mpaka ku Lusulo lwa Yufuleti.

²⁶ Jwalakwe tacisalila kuti, ‘Ŵalakwe ali Atati ŵangu, Mlungu jwangu, ni lwala lwakungulupusya.’

²⁷ Kusyene tinjimtenda kuŵa mwanangu jwandanda kupagwa, jwakwapunda ayimwene wosope ŵa pa cilambo capasi.

²⁸ Tinjimnonyela ndaŵi syosope ni cinonyelo cangu cangamala, cilanga cangu ni jwalakwe ngasicikasika.

²⁹ Tinjiyitamika pa citengu ca ucimwene yisukulu yakwe kwa yaka yosope, ni ucimwene wakwe tiwuciŵa wakutamilicika mpela kwinani.

³⁰ “Nambo naga ŵanace ŵakwe akwasa malamusi gangu, ni kwenda matala gangalumbana,

³¹ naga akukasa malamusi gangu; ni ngagosa majiganyo gangu;

³² Tinjakwapula ni simbo ligongo lya yakulemwa yawo, tinjakwapula ni yikoti ligongo lya ulemwa* wawo.

³³ Nambo ngisinamtyocesya cinonyelo cangu cangamala Daudi, ngasindama jwangakulupicika kwa jwalakwe.

³⁴ Ngisingasa cilanga cangu ni jwalakwejo, kapena kugalawusya maloŵe gele gagakopwece pakamwa pangu.

³⁵ “Nalumbile kamope mu uswela wangu kuti, ngasinamlambusya Daudi.

³⁶ Yisukulu yakwe tiyicilamulila kwa yaka yosope, ni citengu cakwe ca ucimbicimbi ticicitama kwa yaka yosope, pameso pangu.

³⁷ Ucimwene wakwe tiwucitamilicika kwa yaka yosope mpela mwesi wawuli mboni jangu jakulupicika kwinani.”

Kulila ligongo lyakupundidwa kwa mwenye ku ngondo

³⁸ Nambo sambano Ŵalakwe amjasile ni kumkana mwenye juŵamtasile m'mawuta, amtumbilile mwa ukali mnope.

³⁹ Ŵalakwe akasile cilanga ciŵaciŵisile kwa jwakutumicila jwawo, aciponyisye cisindi cakwe mluwundu.

⁴⁰ Ŵalakwe agumwile mapupa gakwe gosope; mapupa gakwe kuŵa masame.

⁴¹ Wosope ŵakupita mwitala akumsumula yindu yakwe, acalongo acimjakwe akumseka.

⁴² Ŵapele macili amagongo ŵakwe ŵasangalalisye amagongo ŵakwe wosope.

⁴³ Amsumwile yida yakwe ya ngondo, ni nganamcenjela pa ngondo.

⁴⁴ Ŵalakwe amsumwile simbo jakwe ja ucimwene m'makono mwakwe ni kuciponya pasi citengu cakwe.

⁴⁵ Ŵalakwe amcekulupisye citemape; amtesisye soni.

Lipopelo lyakuŵenda cikamucisyo

⁴⁶ Mpaka cakaci, Ŵalakwe AMBUJE? Ana talisise asyene kwa yaka yosope? Mpaka cakaci kutumbila kwawo tikuŵe mkolela mpela moto?

⁴⁷ Akumbucile kuti masiku ga umi ŵangu gali gamnono. Elo, ŵapanganyisye ŵandu wosope kuti akole umi wawujipi mnope.

⁴⁸ Ana ŵani ŵitacitama ni umi ŵangaciwona ciwa? Ŵani ŵa mpaka awukulupusye umi wawo ku macili ga mwilembe?

⁴⁹ Cijile kwapi cinonyelo cawo cangamala cakala cila, ciŵamlumbilile Daudi kuti taciŵa ŵakulupicika?

⁵⁰ AMBUJE, acikumbucile cipongwe cingucipocela une jwakutumicila jwawo, ni soni kuti mbimilile cipongwe ca ŵandu ŵelewo mu mtima mwangu.

⁵¹ Akumbucile kuti ŵele ŵakunyosya une, ali amagongo ŵawo ŵalakwe jemanjajo akumseka mwenye juŵamtasile ŵalakwe mawuta.

⁵² Acimbicikwe AMBUJE kwa yaka yosope. Yiŵe myoyo! Yiŵe myoyo!