Masalimo 88 - Chiyawo Bible

Lipopelo lyakuŵenda cikamucisyo

Nyimbo. Salimo ja ŵanace ŵa Kola. Kwa jwakwimbisya nyimbo pa Mahalati Leanoti. Ndakatulo ja Hemani jwa lukosyo lwa Esala.

¹ Ŵalakwe AMBUJE* Mlungu jwangu, ngwalilila ŵalakwe musi ni cilo kuti angamucisye.

² Akunde lipopelo lyangu lyayicile ŵalakwe, apikane kulila kwangu.

³ Pakuŵa umi ŵangu ugumbele ni yisawusyo, umi ŵangu ukuŵandicila ku malo ga ŵandu ŵawe.*

⁴ Akumbalanjila pampepe ni ŵandu ŵakwinjila mwilembe. Une ndili mundu jwangali macili.

⁵ Ndili mpela mundu jwamlesile jika pasikati pa ŵandu ŵawe, mpela mundu jwam'we jwakugona mwilembe. Ndili mpela ŵandu ŵangakwakumbucila ŵalakwe, pakuŵa amasile kutyoka m'makono mwawo.

⁶ Ŵalakwe ŵambisile une pasi mkati mwa lilembe, m'malo mwakusokoka mwa cipi.

⁷ Kutumbila kwawo kusitopele, akunditimisya ni matumbela gawo.

⁸ Ŵalakwe ŵakundile acimjangu kuti andile, syucile cindu cakwanyalaya. Ambugalile kwakuti ngangupakombola kutila.

⁹ M'meso mwangu mutesile cipi ligongo lya canasa. Ngusinaŵilanga Ŵalakwe AMBUJE, lisiku ni lisiku. Ngusimbopela pakukwesya makono gangu kwa ŵalakwe.

¹⁰ Ana akusiŵatendela yindu yakusimonjeka ŵandu ŵawe? Ana akupakombola kwimuka kuti ŵalumbe ŵalakwe?

¹¹ Ana cinonyelo cawo cangamala akusacilalicila ku malembe kapena kulupicika kwa ŵalakwe ku malo kwakonasikako?

¹² Ana yakusimonjeka yawo yikusawoneka ku malo ga cipi gala kapena umbone wawo ku cilambo ca ŵandu ŵakuliŵalika?

¹³ Nambo une ngwalilila Ŵalakwe AMBUJE, kundaŵi lipopelo lyangu likusayika kwa ŵalakwe.

¹⁴ Ŵalakwe AMBUJE, ligongo cici akunjasa? Ligongo cici akusisa ngope jawo?

¹⁵ Kutandilila wanace wangu mpaka kula, mbimilile yipwetesi yawo, mpaka ciŵandika kuwa, sambano une masile.

¹⁶ Kutumbila kwawo kumbwetece anjonasile ni ukali wawo wakogoya.

¹⁷ Yipwetesi yosopeyi yisyungulile mpela mesi ga cikumba lisiku lyosope; yisiŵile mbali syosope.

¹⁸ Ŵalakwe ŵatyosisye acimjangu ni ŵandu ŵakunonyela, mjangu jwasigalile cili cipi.