Masalimo 87 - Chiyawo Bible

Nyimbo ja kuwulumba msinda wa Yelusalemu

Salimo ja ŵanace ŵa Kola. Nyimbo.

¹ AMBUJE* ataŵile msinda ŵawo petumbi lyeswela,

² kupunda malo gane galigose mu Isalaeli akuwunonyela msinda wa Yelusalemu.

³ Mpikane, m'mwe msinda wa Mlungu, ku yindu yakusimonjesya yakwamba m'mwejo:

⁴ Pasikati pa ŵakumanyilila une, ngusaŵalanjila Lahabu ni Babiloniya soni cilambo ca Filisitiya, Taya, ni Ifiyopiya, ŵandu akusati, “Aŵa ŵapagwile kukoko.”

⁵ Nambo yakwamba Siyoni* tacisala kuti, “Wosope ŵapagwile kukoko;” pakuŵa Ŵakwinani Mnope asyene ni ŵitaciwulimbisya msindawo.

⁶ AMBUJE pakulemba mena ga mitundu josope ja ŵandu taciti kuti, “Aŵaŵa ŵapagwile ku Siyoni.”

⁷ Ŵakwimba ni ŵakuŵina taciti, “Ku Siyoni ni kuwukutyocela upile ŵetu wosope.”