Masalimo 86 - Chiyawo Bible

Lipopelo lyakuŵenda cikamucisyo

Lipopelo lya Daudi.

¹ Ambikane une, ŵalakwe AMBUJE* ni anjanje, pakuŵa une jwakulaga ni jwangali cingwete.

² Awusunje umi ŵangu, pakuŵa une ndili jwakwapikanila Ŵalakwe. Angulupusye une jwakutumicila jwawo pakuti ngwakulupilila ŵalakwe.

³ Ŵalakwe ali Mlungu jwangu, asalalile mtima; Ngusapopela kwa ŵalakwe lisiku lyosope.

⁴ Awusangalasye umi wa une jwakutumicila jwawo, pakuŵa ngupeleka umi kwa ŵalakwe AMBUJE.

⁵ Ŵalakwe AMBUJE ali ŵambone, ni ŵakululucila ŵandu ŵawo. Cinonyelo cawo cangamala cili cacikulungwa kwa wosope ŵakwapopela ŵalakwe.

⁶ Apikane ŵalakwe AMBUJE, ku lipopelo lyangu kuti apikane kulila kwangu kwakuŵenda cikamucisyo.

⁷ Pa lisiku lya yisawusyo ngusinaŵilanga ŵalakwe, pakuŵa akusajanga mapopelo gangu.

⁸ Pangali mlungu pasikati pa milungu jine, jakulandana ni ŵalakwe AMBUJE, ni pangali masengo gakulandana ni masengo ga ŵalakwe.

⁹ Ngosyo syosope sya ŵandu siŵasipanganyisye tisiciyika, ni kwajinamila ŵalakwe AMBUJE, ni kulilumba lina lyawo.

¹⁰ Pakuŵa ŵalakwe ali ŵamacili ni akusatenda yindu yakusimonjeka, ŵalakwe jika ali Mlungu.

¹¹ Anjiganye une matala gawo, yakusaka ŵalakwe kuti une niyitendeje; nipo tinjapikanila mwakulupicika.

¹² Ŵalakwe AMBUJE Mlungu jwangu, ngwatogolela ni mtima wangu wosope, tinjililumba lina lyawo yaka yosope.

¹³ Pakuŵa cinonyelo cawo cili cangamala kwa une cili cacikulungwa; Angulupwisye kutyocela ku malo gakusokoka ga ŵandu ŵawe.

¹⁴ Ŵalakwe Mlungu, ŵandu ŵacipongwe anjimucile une, ŵandu ŵangali canasa akuwusosa umi ŵangu ni ngakusamala ya ŵalakwe.

¹⁵ Nambo Ŵalakwe AMBUJE ŵali Mlungu ŵa canasa ni wambone mtima, ŵangatumbila citema, ŵakwete cinonyelo cangamala soni ŵakulupicika.

¹⁶ Angalawucile une ni kundendela canasa, ambe macili une jwakutumicila jwawo, angulupusye une mwanace jwa ŵakutumicila jwawo jwamkongwe.

¹⁷ Andosye cimanyisyo cakuti akusalalila mtima, kuti ŵakuŵengana none atende soni. Pitacilola kuti ŵalakwe AMBUJE, angamucisye ni kulimbisya mtima.