Masalimo 85 - Chiyawo Bible

Lipopelo lyakuŵenda mtendele ŵa pa cilambo

Kwa jwakwimbisya nyimbo. Salimo ja ŵanace ŵa Kola.

¹ AMBUJE,* ŵalakwe ŵacisalalile mtima cilambo cawo; Ŵatesile Aisalaeli kuti yindu yajendeleje soni cenene.

² Ŵayikululucile ya kulemwa ya ŵandu ŵawo, ŵakululwice yakulemwa yawo yosope.

³ Ŵawutondweye ukali wawo wosope wakogoya ŵawulekasisye ukali wawo kolela moto.

⁴ Atuwucisye soni mwakala, ŵalakwe Mlungu mkulupusyo jwetu, atyosye kwetuwe kutumbila kwawo.

⁵ Ana taŵe mkututumbilila kwa yaka yosope? Ana taŵepe citumbilile mpaka yisukulu yetu yosope?

⁶ Ana ngasatupa soni umi, kuti uwe ŵandu ŵawo tusangalale mwa ŵalakwe?

⁷ Atulosye cinonyelo cawo cangamala Ŵalakwe AMBUJE, ni kutukulupusya.

⁸ Mbikane yitaciŵeceta AMBUJE Mlungu, pakuŵa taciŵeceta ya mtendele kwa ŵandu ŵakwe, kwa ŵandu ŵakwe ŵaswela mtima, naga ngakuwujila soni kuyitenda yakuloŵela yawo.

⁹ Kusyene, cikulupusyo cakwe cili ciŵandika kwa ŵele ŵakumjogopa Jwalakwejo; kuti lumbili lwakwe luŵe mcilambo mwetu.

¹⁰ Cinonyelo cangamala ni kulupicika tiyicingangane. Cilungamo ni mtendele tiyicikamulana.

¹¹ Ŵandu ŵakwe taciŵa ŵakulupicika pasi pano; Mlungu ŵakwinani tacalungamisya.

¹² Elo, AMBUJE tacipeleka yayili yambone, ni cilambo cetu tucigowola yejinji.

¹³ AMBUJE ali jwambone citandilile, ni cilungamo cakwe cikolosya litala lyakwe.