Masalimo 84 - Chiyawo Bible

Kusaka kutama m'nyumba jawo AMBUJE

Kwa jwakwimbisya nyimbo. Pakukuya wimbe wa Gititi. Salimo ja ŵanace ŵa Kola.

¹ Alole kusalala kwakwe kwa malo gawo gakutama ŵalakwe AMBUJE* Ŵamaciligosope.

² Umi ŵangu ukusacilila, kutama m'Nyumba jawo AMBUJE, ni mtima ŵangu wosope ngwajimbila mwakusengwa ŵalakwe Mlungu ŵacijumi.

³ Atamose timba akutaŵa cisusi, nombe yijuni yakolanjidwa kaŵaleŵale yikwete malo gakwe; ni kwagoneka ŵanace ŵakwe ciŵandika ni malo gakupelecela mbopesi, AMBUJE Ŵamaciligosope; mwenye jwangu ni Mlungu jwangu.

⁴ Ŵana upile ŵandu ŵele ŵakutama m'Nyumba jawo ŵalakwe, acijimbaga nyimbo syakwalumba Ŵalakwe ndaŵi syosope.

⁵ Ŵana upile ŵandu ŵele macili gawo gakutyocela kwa ŵalakwe. Ŵandu ŵakusaka kwenda mwitala kuja kukwalambila ŵalakwe Kwitumbi lya Siyoni.*

⁶ Pakupita m'Ciŵata ca Baka cangali mesi, cikusasyuka ciŵata ca mesi ga nduluko; ula ja cisimawupya jikusacigumbasya ni matanda.

⁷ Macili gawo gakutupa, Mlungu jwa milungu taciwoneka mu msinda wa Siyoni.

⁸ Ŵalakwe AMBUJE Mlungu jwamaciligosope, apikane lipopelo lyangu; ŵalakwe Mlungu jwa Yakobo.*

⁹ Mlungu, ŵalakwe ali ŵakunjenjela ŵangu; ajilole ngope ja mwenye jwamsagwile.

¹⁰ Kutama lisiku limope m'Nyumba jawo, cili cakunonyelesya mnope kulekangana ni kutama masiku gamajinji kwine kulikose. Nganonyelwe kuŵa jwakulindilila pa mlango wa Nyumba ja AMBUJE jwangu kulekangana ni kutama m'Nyumba sya ŵandu ŵakusakala.

¹¹ Pakuŵa AMBUJE ŵakutucinjilicisya ŵetu ni mwenye jwetu jwa lumbili, akusatupa upile mwa umbone wakwe mtima ni mwa ucimbicimbi. Jwalakwejo jwangakanya yindu yambone kwa ŵele ŵakwenda mwagoloka.

¹² Ŵalakwe AMBUJE Ŵamaciligosope, ŵana upile ŵele ŵakulupilila mwa ŵalakwe.