Masalimo 83 - Chiyawo Bible

Lipopelo lyakuŵenda kuti amagongo ŵa Isalaeli apundidwe

Nyimbo. Salimo ja Asafu.

¹ Ŵalakwe Mlungu akasatama jii, akasatama ndwi, ngaŵeceta kandu, ŵalakwe Mlungu.

² Alole, amagongo ŵawo akusinganga; ŵele ŵakwaŵenga ŵalakwe ŵajimucile.

³ Akwapanganila yakusakala ŵandu ŵawo. Akwapanganila yakusakala ŵandu ŵawo ŵakwacenjela.

⁴ Akusala kuti, “Kwende tuwusimasye mtundu wawo wosope. Kuti lina lya Isalaeli likapikanika soni.”

⁵ Elo, akupikangana pakupangana ya malindi, akupangana yakwajimucila ŵalakwe,

⁶ ŵandu ŵakutama m'matenti ga Aedomu ni ga Aishimaeli; ŵandu ŵa ku Mowabu ni Ahagili,

⁷ ni Gebali ni Amoni ni Amaleki Filisitiya ni ŵa ku Taya.

⁸ Asiliya nombe akamulene nawo, kuti alimbisye macili ga ŵanace ŵa Loti.

⁹ Ŵatende jemanjajo yiŵatesile Amidiyani, Sisela, ni Yabini ku Lusulo lwa Kishoni,

¹⁰ ŵele ŵaŵajonasice ku Endoli, ni kwasandusya ndoŵe sya mwitaka.

¹¹ Ŵakulongolela ŵawo ŵatende yiŵamtesile Olebu ni Seebu, ni ŵanace ŵa ayimwene ŵawo wosope, ŵatende yiŵamtesile Seba ni Salimuna.

¹² Ŵele ŵaŵatite, “Kwende tusumule cilambo ca Mlungu kuti ciŵe cetu.”

¹³ Ŵalakwe Mlungu jwangu, ŵapwilinganye mpela luwundu lwa cimbunga, aŵe mpela masapi gagakuwululuka ni mbungo.

¹⁴ Mpela moto ukasajoca ukweti, ni mpela lilamba likusakolela pa matumbi,

¹⁵ myoyo ŵalakwe ŵatoposye jemanjajo ni mbungo jakogoya, ni ŵajogoye ni cimbunga cawo ca macili.

¹⁶ Ŵalakwe AMBUJE* ŵatesye soni, kuti alisose lina lyawo.

¹⁷ Syakamule soni, ni woga kwa yaka yosope; awe ciwa cakutesya mcesela.

¹⁸ Amanyilile kuti ŵalakwe jika ŵele lina lyawo lili AMBUJE, ali Ŵakwinani Mnope ni ŵakulamulila pa cilambo cosope capasi.