Masalimo 81 - Chiyawo Bible

Nyimbo ja cindimba

Kwa jwakwimbisya nyimbo. Pakukuya wimbe wa Gititi. Salimo ja Asafu.

¹ Mkwesye maloŵe kumjimbila Mlungu jwali macili getu; gumilani mwakusengwa kwa Mlungu jwa Yakobo.*

² Mjitande nyimbo, gombani ngoma pampepe ni yida yakwimbila ya ngonji yakulila cenene ni pangwe.

³ Gombani lipenga mwesi ucikopokaga mwasambano, pati ucikopokaga kwambumbu, soni pa lisiku lyetu lyacindimba.

⁴ Pakuŵa ni lilamusi lya Aisilayeli, Lilamusi lya Mlungu jwa Yakobo.

⁵ Ŵapelece lilamusi kwa yisukulu ya Yosefe, piyakopokaga mcilambo ca Iguputo. Une ngumpikana mundu jwine jungangum'manyilila acitiji,

⁶ “Namtusile katundu pa makoyo penu. Makono genu nagapumwisye ku masengo gakunyakula ngalala.

⁷ Pimwaliji myisawusyo mwambilasile ni une namkulupwisye. Namjanjile ndili ku malo gangu gakusisika mkulindima, namlinjile kumesi ga Meliba kula.

⁸ Jemanja ŵandu ŵangu, mpikane pangumtetela. Isalaeli nganonyele kuti mkambikanile une.

⁹ Ni mkamjinamila mlungu jwa cilendo.

¹⁰ Une AMBUJE* Mlungu jwenu, junamkopwesye mcilambo ca Iguputo. Mjasamukule kukamwa, une tinamlisye.

¹¹ “Nambo ŵandu ŵangu nganagapikana maloŵe gangu; Isalaeli ŵakanile kumbikanila une.

¹² Myoyo nalesile ni mitima jawo jangapikanajo. Kuti akuye yiŵayisakaga.

¹³ Ŵandu ŵangu akambikanile, Aisilayeli akajesile m'matala gangu.

¹⁴ Mwacitemape ngapundile ŵandu ŵakuŵengana nawo, ni mkono wangu ngakunwile amagongo ŵawo.

¹⁵ Ŵandu ŵele ŵakuŵengana ni AMBUJE, ŵajineme pameso pakwe, likungu lyawo likaliji lya yaka yosope.

¹⁶ Ngamlisisye utandi wakutililika wa tiligu, ngamjikutisye ni uci wakutyocela mlwala.”