Masalimo 80 - Chiyawo Bible

Lipopelo lyakuŵenda kuti mtundu ŵa Isalaeli uwujile mwakala

Kwa jwakwimbisya nyimbo. Pakukuya wimbe wa nyimbo jakuti: Akakombo. Umboni wa Asafu. Salimo.

¹ Atupikane Ŵalakwe Mkucinga jwa Isalaeli, ŵalakwe ŵakulongolela ŵandu ŵa Yosefe mpela ngondolo. Ŵalakwe ŵakutama pacanya pa akelubi mpela pa citengu cawo ca ucimwene,

² alilosye asyene ku mitundu ja Efelemu ni Benjamini ni Manase. Agalosye macili gawo, ayice kutukulupusya.

³ Ŵalakwe Mlungu, atuwucisye mwakala, atutendele canasa, ni kutukulupusya uwe.

⁴ Ŵalakwe AMBUJE* Mlungu jwa mipingo, tagatumbilile mapopelo ga ŵandu ŵawo mpaka cakaci?

⁵ Ŵalisisye canasa mpela mkate ni ŵapele misosi mpela cakumwa.

⁶ Atutesile kuŵa cindu cakunyosyeka kwa acalongo acimjetu; amagongo ŵetu akutuseka ali atemi pampepe.

⁷ Ŵalakwe Mlungu ŵamacili gosope, atuwucisye mwakala, atutendele canasa, kuti uwe tukulupuce.

⁸ Ŵalakwe ŵaŵakopwesye mpeleya wawo kutyocela ku Iguputo. Ŵalakwe ŵasitopwele ngosyo sya ŵandu kuti awupande mpeleyawo.

⁹ Ŵalakwe ŵalimile mgunda ŵa mpeleyawo ni mwamesile miciga jakutambala, ni jatambele mu mgunda mosope.

¹⁰ M'bwilili wakwe wawunicile matumbi, ni nyambi syakwe syawunicile mikungusa jajikulungwa mnope.

¹¹ Nyambi syakwe syajile kwika mpaka ku nyasa, ni yakusipuka yakwe yakopocele ku lusulo.

¹² Ligongo cici ŵapaswile uŵigo wakwe, kwakuti wosope ŵakupita mwitala akukonyola yisogosi yakwe?

¹³ Maguluŵe ga mwitinji gakuwujonanga, ni cilicose cacikwenda mu mgundamo cikulya yisogosi.

¹⁴ Agalawucile soni kwa uwe, ŵalakwe Mlungu ŵamacili gosope! Alingulile ŵalakwe ŵakutama kwinaniko, ni kulolecesya. Awusamalile mpeleyawo.

¹⁵ Ayice acikulupusye citela ca mpeleya ciŵacipandile ŵalakwe, citela ca mpeleya ca mwana cimwacitesile kuti cikule mwamacili.

¹⁶ Amagongo ŵetu acijocile, ni kucigwicisya pasi, ŵalole jemanjajo ali atumbile ni kwajonanga.

¹⁷ Nambo ni mkono wawo ŵacenjele ŵandu ŵawo ŵaŵasagwile, ni ŵaŵapele macili kuti ŵatumicile.

¹⁸ Sambano ngasitwaleka soni ŵalakwe, atupe umi ni tucalumba ŵalakwe.

¹⁹ Ŵalakwe AMBUJE Mlungu ŵamacili gosope, atuwucisye mwakala, atutendele canasa, kuti uwe tukulupuce.