Masalimo 8 - Chiyawo Bible

Lumbili lwa Mlungu ni ucimbicimbi wa mundu

Kwa jwakwimbisya nyimbo. Pakukuya wimbe wa Gititi. Salimo ja Daudi.

¹ AMBUJE,* Mlungu jwetu, lina lyawo lili lyalikulungwa pa cilambo cosope! Kwinani nombe nako akwajimbila nyimbo sya lumbili lwawo;

² ŵanace ni makandi nombe nawo akwajimbila nyimbo sya malumbo. Ŵalakwe ataŵile lipupa lyakuti alicinjilicisye kwa amagongo ni ŵakusisyana nawo.

³ Pingukuwona kwinani masengo ga magasa gawo, mwesi ni ndondwa siŵasiŵisile kweleko,

⁴ Ngusaliwusya kuti, “Ana mundu ali nduni kuti ŵalakwe akumkumbucila, ni mwanace jwa mundu ali nduni kuti ŵalakwe amsamalileje?”

⁵ Pakuŵa ŵalakwe ŵampanganyisye mwakumnondiya, ni akum'weca cisindi ca lumbili ni ucimbicimbi.

⁶ Ŵalakwe ŵampele ulamusi pa yosope yiŵapanganyisye; Ŵalakwe ŵayiŵisile yindu yosope pa yosope yaŵayipanganyisye:

⁷ ngondolo, ni ng'ombe syosope ni yinyama yosope ya mwitinji,

⁸ yijuni ya mwinani, ni somba, ni cilicose cicikupita pasi pa nyasa.

⁹ AMBUJE, Mlungu jwetu, lina lyawo lili lyalikulungwa mcilambo cosope!