Masalimo 79 - Chiyawo Bible

Lipopelo lyakuŵenda kuti mtundu wosope ukulupuce

Salimo ja Asafu.

¹ Ŵalakwe Mlungu, ŵandu ŵakusa ajinjile mcilambo ca ŵandu ŵawo, asakesye Nyumba jawo jajiswela; atesile Yelusalemu kuŵa masame.

² Ajasile mitembo ja ŵakutumicila ŵawo kuti jiŵe cakulya ca yijuni ya mwipananga, ajasile yilu ya ŵandu ŵawo ku yilombo ya mwitinji.

³ Asulwisye miasi jawo mpela mesi, kusyungulila Yelusalemu; ni paliji pangali jwalijose jwakuŵika malilo gawo mwilembe.

⁴ Tuŵele ŵakwaluka kwa acalongo acimjetu, ŵandu ŵa mitundu jine* akututenda cipongwe ni kutuseka.

⁵ Mpaka cakaci ŵalakwe AMBUJE* taŵe citumbilile? Ana kutumbila kwawo tukukolelejepe mpela moto?

⁶ Awugwisye ukali wawo pa ngosyo sya ŵandu ŵangakwamanyilila ŵalakwe, ni pa ŵandu ŵangakupopela kwa ŵalakwe.

⁷ Pakuŵa ŵawuleje ŵandu ŵa Yakobo,* ni cilambo cawo acisandwisye lisame.

⁸ Akasatupa uwe yipwetesi ligongo lya kulemwa kwa acinangolo ŵetu; atutendele canasa ligongo atutulwisye uwe mnope.

⁹ Atukamucisye, Ŵalakwe AMBUJE mkulupusyo jwetu, kuti lina lyawo liŵe ni lumbili. Atukulupusye, ni kutukululucila yakulemwa yetu, kuti lina lyawo licimbicikwe.

¹⁰ Ligongo cici ŵandu ŵa ngosyo sine akuti, “AMBUJE ŵawo ali kwapi?” Akunde kuti twalole Ŵalakwe ali mkwawucisya ŵandu ŵa ngosyo sine, ligongo lyakusulusya miasi ja ŵakutumicila ŵawo.

¹¹ Akupikane kuwuwula kwa ŵandu ŵali mu ukayidi, mwamacili gawo gamakulungwa ŵagopole ŵandu ŵaŵalamwilwe kuti ŵawulaje.

¹² Ŵalakwe AMBUJE ŵawucisye cilango kasano ni kaŵili ŵandu ŵa ngosyo sine, ligongo lyakunyosya ku ŵanyosisye ŵalakwe kula.

¹³ Sambano uwe ŵandu ŵawo ngondolo sya palulila pawo, tucatogolela ŵalakwe kwa yaka yosope; tucipeleka malumbo kwa ŵalakwe kwa yaka yosope.