Masalimo 78 - Chiyawo Bible

Mlungu ni ŵandu ŵakwe

Ndakatulo ja Asafu.

¹ Mpikanicisye yele yingumjiganya, ŵandu ŵangu, mtejele mapikanilo, mpikane maloŵe ginguŵeceta.

² Tinjiŵeceta mwakusyepelesya; tinjisala ngani syakusisika syacikala.

³ Yindu yitwayipikene ni kuyimanyilila; yele acinangolo ŵetu ŵatutagulile.

⁴ Ngasitwasisila ŵanace ŵawo; nambo taciyisalila yisukulu yayikwisayo, ya macili ga AMBUJE* ni yitendo yayikulungwa, ni yindu yakusimonjeka yayitesile.

⁵ Ŵapelece maloŵe ga umboni kwa Yakobo* ni ŵagatamice malamusi gakwe mu Isalaeli. Ŵagombelecesye acinangolo ŵetu kuti ŵajiganye ŵanace ŵawo malamusigo.

⁶ Myoyo yisukulu yakwisayo ya ŵanace ŵimkinapagwe tacigamanyilila, nombe nawo tacasalila ŵanace ŵawo.

⁷ Mwakuti ŵanacewo taciŵika cikulupi cawo mwa AMBUJE, ni ngasaliŵalila yitendo ya Mlungu, nambo kugasunga malamusi gawo.

⁸ Akasaŵa mpela acinangolo ŵawo, ŵandu ŵakwimucila ni ŵangapikana ŵala, ŵandu ŵele mitima jawo jaliji jangatamilicika kose, umi wawo nganiwuŵa wakulupicika kwa Mlungu.

⁹ Atamose Aefelemu ŵakwapatile ukunje, ŵatisile pa lisiku lya ngondo.

¹⁰ Nganasunga cilanga* ca Mlungu; ŵakanile kugakuya malamusi gakwe.

¹¹ Jemanjajo ŵaliŵalile yiŵatendele Mlungu; ni yakusimonjeka yiŵalosisye.

¹² Mlungu ŵatesile yakusimonjeka yakwe, acinangolo ŵawo acilolaga, mcilambo ca Iguputo ku lilambo lya Sowani.

¹³ Ŵajigawile nyasa pasikati kuti ŵelewo ajende pelepo, ŵagajimice mesi mpela lipupa.

¹⁴ Musi ŵalongolelaga jemanjajo ni liwunde, cilo ŵalongolelaga ni kuŵala kwa moto.

¹⁵ Ŵakasile maganga ga mcipululu ni ŵapele mesi gamajinji, mpela mesi gakutyocela mu lusulo.

¹⁶ Ŵakopwesye sulo kutyocela mu lwala ni ŵagatesile mesi gajilime mpela sulo.

¹⁷ Nambo ŵapelengenye kumlemwecesya jwalakwe; ŵamjimucile Mlungu Jwamaciligosope mcipululu.

¹⁸ Ŵamlinjile Mlungu m'mitima mwawo, pakumcisya kuti ŵape yakulya yiŵayisacile.

¹⁹ Ŵaŵecete mwakusisyana ni Mlungu acitiji, “Ana Mlungu akupakombola kutupa yakulya mcipululu muno?

²⁰ Jwalakwe ŵaputile pa lwala, mesi gakopwece, sulo syagumbalile. Ana tapakombole soni kutupa uwe ŵandu ŵakwe mkate kapena kutusosela nyama?”

²¹ Ni ligongo lyakwe AMBUJE piŵapikene yeleyi ŵapile mtima mnope, ni ŵamkolecesye moto Yakobo, ŵapundile kumtumbilila Isalaelijo.

²² Pakuŵa nganakola cikulupi mwa AMBUJE; nganakulupilila macili gakwe gakulupusya.

²³ Nambo Jwalakwe ŵagalamulile mawunde gagali mwipananga ni ŵawugwile matanga gakwinani.

²⁴ Ni ŵagwicisye mana kuti alye; ni ŵapele tiligu jwakwinani.

²⁵ Pelepo ŵandu ŵalile mkate wa malayika; Mlungu ŵatumicisye jemanjajo yakulya yejinji.

²⁶ Ŵajipujisye mbungo jakungopoko lyuŵa, ni mwamacili gakwe ŵajikopwesye mbungo ja mwela.

²⁷ Ŵagwicisye nyama jejinji mpela luwundu, yijuni yaguluka mpela msanga wa ku nyasa.

²⁸ Ŵayigwisisye pasikati pa masakasa gawo, kusyungulila piŵatamagapo.

²⁹ Ŵalile wosope ni ŵajikwite, pakuŵa ŵapele jemanjajo yakulya yiŵayisakaga.

³⁰ Nambo lukowo mkanilumale, soni mkanamile kose yakulya yawo,

³¹ kutumbila kwa Mlungu kwakolele pa jemanjajo, ni ŵawuleje ŵakulimbangana wosope pasikati pawo, ŵawuleje acacanda ŵosope ŵambone ŵa mu Isalaeli.

³² Atamose yaliji myoyo, jemanjajo ŵapelengenye kulemwa, nganakulupilila atamose kuti ŵayiweni yakusimonjeka yiŵayitesile Mlungu.

³³ Myoyo Mlungu ŵagajipiye masiku gawo kuti gatyoce mpela lipuje; soni yaka yawo yimalile myipwetesi.

³⁴ Piŵawulagaga ŵane; ŵakusigalila ŵatandite kumsosa Jwalakwe. Ŵaliji mkupesya, ali mkumsosa Mlungu ni mtima wawo wosope.

³⁵ Ŵakumbucile kuti Mlungu ali lwala lwawo lwakwacenjela, ni kuti Mlungu Jwamacili mnope ŵakamucisye jemanjajo.

³⁶ Nambo ŵamlambwisye ni pakamwa pawo; ŵamlambwisye jwalakwe ni lulumi lwawo.

³⁷ Mtima wawo nganiwuŵa ŵakulupicika kwa Jwalakwe. Nganacisunga cilanga cakwe.

³⁸ Nambo Mlungu pakuŵa ali jwa canasa, ŵakululucile yakulemwa yawo, nganiŵajonanga kose jemanjajo. Kaŵili kaŵili ŵalilekasyaga kutumbila, nganakunda kwimusya ukali ŵawo wosope.

³⁹ Ni ŵakumbucile kuti ŵelewo ali ŵandu cabe, ali mpela mbungo jajikupita ngawujilila soni.

⁴⁰ Kaŵili kaŵili ŵamjimucilaga mcipululu; ni kumdandawulisya.

⁴¹ Kaŵili kaŵili ŵamlingaga, ni ŵamtandaga Jwamswela jwa Isalaeli.

⁴² Nganakumbucila macili gawo, kapena ya lisiku liŵawombwele kwa amagongo ŵawo,

⁴³ piŵatesile Jwalakwe yimanyililo yamacili ku Iguputo, ni yakusimonjeka ku Sowani.

⁴⁴ Mlungu ŵagalawisye mesi ga sulo syawo kuŵa miasi, kwakuti Aiguputo nganapamwa kose mesigo.

⁴⁵ Ŵatumicisye pasikati pawo membe syejinji sisyasawisye; ni yula yiyajonasile cilambo cawo.

⁴⁶ Ŵatumicisye sombe kuti alye mbeju syawo ni sombe kuti silye yosope ya m'migunda mwawo.

⁴⁷ Ŵajonasile mipeleya ni matalila, ni nguju syawo syajonasice ni cisisila.

⁴⁸ Ŵasiwuleje ng'ombe syawo ni matalila ni yilangwa yawo soni kuti yiwe ni njasi.

⁴⁹ Ŵatendele ukali wakogoya, ŵapilile mtima, ni ŵatumbilile, ni ŵagwicisye yisawusyo. Yeleyi yayicilile mpela likuga lya malayika ŵakwinani ŵakuwulaga.

⁵⁰ Ŵapundile kutumbila, nginiŵakulupusya ku ciwa, nambo ŵawupelece umi wawo ku mlili.

⁵¹ Ni ŵawuleje ŵanace ŵandanda kupagwa ŵacalume wosope ŵa Aiguputo, niwo ŵanace ŵandanda ŵamacili gawo m'matenti ga Hamu.

⁵² Mlungu ŵakopwesye ŵandu ŵakwe mpela ngondolo, ni ŵalongolele jemanjajo mcipululu mpela yilangwa.

⁵³ Ŵalongolele cenenepe, kwakuti nganatenda woga; nambo nyasa jatitimisye amagongo ŵawo.

⁵⁴ Ni ŵayicisye jemanjajo ku cilambo cawo caciswela, ku cilambo ca matumbi ciŵacipatile ni mkono wawo wamacili.

⁵⁵ Ni ŵasitopwele ngosyo sine pasogolo pawo. Ŵacigaŵilegaŵile cilambo ca ŵanduwo kuti ciŵe ca ŵandu ŵakwe. Ni ŵajitamice mitundu ja Isalaeli m'misi ja ŵanduwo.

⁵⁶ Nambo Aisilayeli ŵamlinjile ni kumjimucila Mlungu jwa Kwinani Mnope. Jemanjajo nganagasunga malamusi gakwe.

⁵⁷ Nambo jemanjajo ŵaliji ŵakulepeceka ni ŵangakulupicika mpela acinangolo ŵawo. Ŵaliji ŵangali mate mpela ukunje wetocomale.

⁵⁸ Mlungu ŵatumbilile jemanjajo ligongo lya malo gawo gakulambila milungu ja yinyago; ŵapile mtima mnope ligongo lya milungu jawo ja kusepa.

⁵⁹ Piŵapikene Mlungu yeleyi ŵatumbile mnope, myoyo ŵakanile Aisilayeli.

⁶⁰ Ni ŵagalesile malo gakwe ku Shilo kuŵatamaga, ŵagalesile malo gakwe giŵatamaga pasikati pa ŵandu.

⁶¹ Ŵakundile amagongo ŵetu kuti asumule Libokosi lya Cilanga, lilyaliji cimanyisyo ca macili gakwe ni lumbili lwakwe.

⁶² Ligongo lyakwatumbilila ŵandu ŵakwe, ŵakundile kuti ŵandu ŵakwewo awulajidwe pangondo.

⁶³ Ngondo jakolele mpela moto ni jawuleje acacanda ŵawo, ni aciŵali ŵawo nganakola ŵakwalomba.

⁶⁴ Ŵakutaga mbopesi ŵawo ŵawulajidwe ni upanga; ni acakongwe ŵawo nganiŵakunda kulila malilo.

⁶⁵ Pambesi pakwe, AMBUJE ŵajimwice mpela ku lugono; mpela mundu jwamacili acigumilaga ligongo lya kolelwa finyo.

⁶⁶ Mlungu ŵatopwele amagongo ŵakwe; ni ŵatendesye soni sya yaka yosope.

⁶⁷ Ŵalikanile liŵasa lya Yosefe, nganawusagula mtundu wa Efelemu.

⁶⁸ Nambo ŵawusagwile mtundu wa Yuda, ni Litumbi lya Siyoni* lyakusalinonyela.

⁶⁹ Ŵataŵile malo gakwe gamaswela mpela malo gakwe gakwinani; gakutamilicika mpela cilambo capasi kwa yaka yosope.

⁷⁰ Mlungu ŵamsagwile Daudi* jwakutumicila jwakwe, ŵamjigele kutyocela ku malo gakulicisya ngondolo,

⁷¹ kwele kuŵalolelaga ngondolo sisyakwete ŵanace, kuti taŵe mkucinga jwa Yakobo, mtundu wakwe, ni Aisilayeli ŵakwinjila majumba gakwe.

⁷² Daudi ŵasamalile ni mtima wakwe wakulipeleka ni ŵalongolele ni mkono ŵakwe mwalunda.