Masalimo 76 - Chiyawo Bible

Mlungu jwakupunda

Kwa jwakwimbisya nyimbo. Salimo ja Asafu jakwimbila yida yakwimbila ya ngonji. Nyimbo.

¹ Mlungu ali jwakumanyika mcilambo ca Yuda, lina lyawo lili lyalikulungwa mu Isalaeli.

² Kumangwawo ni ku Salemu, ni kwakutama ŵalakwe ni ku Siyoni*

³ Kweleko ŵatemenye mipamba ja kupita mwinani, mapende gakucijila, upanga ni yida yosope ya ngondo ya amagongo ŵawo.

⁴ Ŵalakwe Mlungu ali ŵa lumbili, ŵakupikanika mnope, kugapunda matumbi kwa yaka yosope.

⁵ Ŵasumwile yindu yosope yiŵakwete ŵandu ŵakulimba mtima, ŵagonesye lugono lwakuwa nalo, ŵandu ŵa ngondo nganapakombola kutenda kandu ni makono gawo.

⁶ Piŵajogweye jemanjajo, ŵalakwe Mlungu jwa Yakobo,* wosope ŵakwela mahaci ŵagwile pasi ni kuwa.

⁷ Kusyene, Ŵalakwe ali wakogoya, ŵani ŵa mpaka ajime pameso pawo ŵalakwe ali atumbile?

⁸ Ŵatumanyisye yakulamula kwawo ali kwinani, ni ŵandu ŵa cilambo ca pasi ŵatesile woga ni ŵatemi jii,

⁹ Piŵajimwice Ŵalakwe Mlungu kuti ŵalamule; ni kwakulupusya ŵandu ŵali myisawusyo pa cilambo capasi.

¹⁰ Kusyene, kutumbila kwa ŵandu, kukwamba konjecesya lumbili lwawo, ŵatacikulupuka ku cilango cawo, tacitama mwakuŵandikana ni Ŵalakwe.

¹¹ Lumbilani kwa AMBUJE* Mlungu jwenu, ni kuyitenda yele yimlumbilileyo; jemanja ŵa ngosyo ŵimŵandicile mjigale mituka jenu kwa jwalakwe jwakwenela kumjogopa.

¹² Jwalakwe ni jwakwasumula macili ŵandu ŵakulamula, ni kwajogoya ayimwene ŵa pa cilambo capasi.