Masalimo 75 - Chiyawo Bible

Mlungu jwakulamula

Kwa jwakwimbisya nyimbo. Pakukuya wimbe wa nyimbo jakuti: Mkajonanga. Salimo ja Asafu. Nyimbo.

¹ Tukwatogolela ŵalakwe Mlungu; tukwatogolela; tukulikolanga lina lyawo m'mapopelo ni kulalicila ya masengo gawo gakusimonjeka.

² Ŵalakwe akuti, “Najiŵisile ndaŵi jitinjilamula cilambo, ni tinjilamula mwacilungamo.

³ Pacikutenganyika cilambo capasi, ni yosope ya yikutama mwelemo. Une ni jungulimbisya misati jwakwe.”

⁴ Ngusinasalila ŵandu ŵakulikwesya kuti, “Mkasimlikwesyaga,” ni kwa ŵandu ŵakusakala kuti, “Mkasimtwanga.

⁵ Mkasimlikwesya ligongo lya macili genu kapena kuŵeceta yamwano.”

⁶ Pakuŵa kulamula kwa magamboku ngakutyocela kungopoko lyuŵa; kapena kungapilo lyuŵa kapena mcipululu.

⁷ Pakuŵa Mlungu jika ni jutacilamula magambo, akusamnondiya jumo ni kumkusya jwine.

⁸ Pakuŵa m'myala mwa AMBUJE* mwana mgawo wa finyo jwaukali ŵawuwanganye cenene; finyo jwakulula jwetaje yakuŵaŵa. Tacijupungula finyojo, ni ŵandu ŵakusakala ŵa pa cilambo capasi tacimwa ni gugudisya senga syakwe.

⁹ Nambo une tinjisangalala ndaŵi syosope, tinjijimba nyimbo sya kumlumba Mlungu jwa Yakobo* kwa yaka yosope.

¹⁰ Jwalakwe tacikasa macili ga ŵandu ŵakusakala; tacijonjecesya macili ga ŵandu ŵagoloka.