Masalimo 74 - Chiyawo Bible

Lipopelo lyakuŵenda kuti mtundu wosope ukulupuce

Ndakatulo ja Asafu.

¹ Mlungu, ligongo cici ŵalakwe akutujasa kwa yaka yosope? Ligongo cici kutumbila kwawo kukukopoka lyosi mwa ukali pa ngondolo sya pa lulila pawo?

² Ŵakumbucile ŵandu ŵawo, ŵaŵasagwile kala, mtundu wele ŵalakwe ŵawuwombwele kuti uŵe wawowawope. Akumbucile Litumbi lya Siyoni,* liŵatemi ŵalakwe.

³ Ayice kwendela masame gamajonasicega; amagongo ajonasile yindu yosope ya m'Nyumba jawo jajiswela.

⁴ Amagongo ŵawo ŵagumisile mwakondwa m'malo gawo gamaswela; ŵaŵisile mbendela syawo kulosya kuti apundile.

⁵ Akatile yindu yosope, mpela ŵandu mwakusakatila yitela ni maŵago gawo.

⁶ Panyuma pakwe, ŵajigele yisemasema ni nyundo; ni kasanya yakusepa yosope.

⁷ Nyumba jawo ŵajocile moto; malo gakutama ŵalakwe ŵagajonasile pakugagwicisya pasi.

⁸ Ŵaŵecete mu mtima mwawo kuti, “Kwende twajonanje jemanjajo.” Ŵajocile malo gosope gamaswela ga Mlungu mcilambomo.

⁹ Yimanyililo ya mtundu wetu yijonasice, pangali soni jwakulocesya* jwalijose, pangali jwalijose pasikati petu jwakumanyilila ndaŵi jakumalila yindu yeleyi.

¹⁰ Ŵalakwe Mlungu, amagongo wetuŵa taŵe mkutucembulusya mpaka cakaci? Ana amagongo taŵe mkulinyosya lina lyawo ndaŵi syosope?

¹¹ Ligongo cici akuwusisa mkono wawo wakutukamucisya? Kwa ligongo cici akusunga mkono wawo wamlyo pamtima pawo?

¹² Nambo Ŵalakwe Mlungu, ali mwenye jwangu citandilile kalakala, Ŵalakwe ni wakutenda masengo ga kukulupusya cilambo capasi.

¹³ Ŵajigaŵenye nyasa ni macili gawo; ŵakasenye mitwe ja yilombo yakogoya ya m'mesi.

¹⁴ Ŵalakwe ŵajikasile mitwe ja cilombo ca m'mesi cila lina lyakwe Lefiyatani;* ni ŵajijasile mitwejo kuti jiŵe cakulya ca yilombo ya mcipululu.

¹⁵ Ŵalakwe ŵakopwesye mesi ga nduluko ni mtusulo; sulo syangapwela mesi, ŵasijumwisye.

¹⁶ Ŵapanganyisye musi ni cilo; ŵaŵisile mwesi ni lyuŵa m'malo gakwe.

¹⁷ Ŵalakwe aŵisile malile ga cilambo capasi; cuku ni cawu ŵayiŵisile ŵalakwe.

¹⁸ Akumbucile, Ŵalakwe AMBUJE,* kuti amagongo akasiŵaseka mwa cipongwe. Ŵandu ŵacipongwe akulicembulusya lina lyawo.

¹⁹ Akasawupeleka umi wa ngunda jawo Isalaeli ku yilombo ya mwitinji; akusawuliŵalila umi wa ŵandu ŵawo ŵakulaga ku ndaŵi syosope.

²⁰ Acisunje cilanga* cawo; pakuŵa malo gosope gakusisika ga mcilambo ni gakutendela ya ngalwe yejinji.

²¹ Akasakunda kuti ŵandu ŵali myisawusyo atende soni; ŵakunde ŵakulaga ni ŵangali cakwete alilumbe lina lyawo.

²² Ajimuce, Ŵalakwe Mlungu, kuti alicenjele pa magambo gawo, akumbucile kuti ŵandu ŵamwano akwanyosya lisiku lyosope.

²³ Akusaliŵalila njojo sya amagongo ŵawo; ni masegwe gawo, gakulilakulila ndaŵi syosope.