Masalimo 73 - Chiyawo Bible

BUKU JATATU (Masalimo 73—89) Ya cilungamo ca Mlungu

Salimo ja Asafu.

¹ Kusyene Mlungu ali jwambone kwa Aisalaeli kwa ŵele ŵakwete mtima ŵakulungamika ni kwa ŵandu ŵakwete mtima wawuswela.

² Nambo une, nasigele panandi kukuŵala, sajo syangu syasigele panandi kutelesya.

³ Pakuŵa naliji mkutenda wiwu ni ŵandu ŵakulikwesya, panaweni ŵandu ŵangalumbana acisicilaga.

⁴ Pakuŵa ngayikwasimana yipwetesi; yilu yawo yili yakwimbala cenene ni yamacili.

⁵ Ngakulaga mpela mwakulajila ŵandu ŵane; ngakuyiwona yisawusyo mpela acimjawo.

⁶ Ni ligongo lyakwe akusawala kulikwesya mpela cuma ca pa lukosi. Akusawala ngalwe mpela malaja.

⁷ Meso gawo gayimbile ni kwimbala. Mitima jawo jigumbele ni nganisyo syakusaka kutenda yakusakala.

⁸ Akunyosya ni kuŵeceta yakusakala, akulikwesya ni kwajogopa ŵane mwakwakalalicisya.

⁹ Pakamwa pawo pakusaŵeceta yakucembulusya Mlungu jwakwinani, lulumi lwawo lukuŵeceta yangalumbana mcilambo capasi.

¹⁰ Ni ligongo lyakwe atamose ŵandu ŵa Mlungu akwapikanila kwa jemanjajo; ni akwikutila ni yakuŵeceta yawo.

¹¹ Akusati, “Ana Mlungu mpaka ayimanyilile camtuli? Ana Ŵakwinani Mnope akwete lunda?”

¹² Ngumanyilila kuti, mwelemu ni mwakuŵela ŵandu ŵakusakala. Ndaŵi syosope ali pambone, akwamba kusicila kwangalecesya.

¹³ Une sunjile mtima ŵangu wawuswela, naŵile m'myala kulosya kuti nganindemwa kose, nambo pangali cingupata kose.

¹⁴ Pakuŵa mbatile yisawusyo ndaŵi syosope, ni ngupata cilango kundaŵi kulikose.

¹⁵ Ngajile, “Timbecete mpela mwakuŵecetela jemanjajo,” ningaliji jwangakulupicika ku yisukulu yenu.

¹⁶ Nambo pinayiganicisye ni kuyipikanicisya cenene, nayiweni kuti yaliji yindu yakusawusya kuyipikanicisya.

¹⁷ Mpaka panajinjile m'Nyumba ja AMBUJE;* ni pinajiweni mbesi jakwe ja ŵanduwo.

¹⁸ Kusyene ŵalakwe akwaŵika jemanjajo pa malo pakutelesya; tacagwisya mpaka kwajonanga.

¹⁹ Taciŵa ni woga, mwandaŵi jamnono tacijonasika.

²⁰ Ŵalakwe AMBUJE; pitaciyika kukwalamula ŵanduwo; tacanyosya mpela mundu jwakusinyosya sagamisi ali ajimwice kundaŵi.

²¹ Pinaliji mkulaga ni nganisyo, ni kupikana cisoma mu mtima mwangumu.

²² Naliji jwakuloŵela ni jwangamanyilila kandu, naliji mpela cilombo pameso pa ŵalakwe.

²³ Nambo tindame citamile ni ŵalakwe; ŵalakwe akungamula mkono wangu wamlyo.

²⁴ Ŵalakwe akulongolela une ni lunda lwawo; ni panyuma pakwe tacimbocela mu lumbili lwawo.

²⁵ Pangali jwine jungwete kwinaniko akaŵe ŵalakwe Mlungu. Ni pa cilambo capasi pano pangali jwine jungumsaka akaŵe Ŵalakwe.

²⁶ Atamose cilu cangu ni mtima wangu yiŵe yangali macili; Mlungu ni ŵali macili ga mtima ŵangu ni ŵakungaŵila upile kwa yaka yosope.

²⁷ Ngumanyilila kuti ŵele ŵakutama kwakutalikangana ni Ŵalakwe tacijonasika; Ŵalakwe akusiŵajonanga ŵelewo ŵangakwakulupilila ŵalakwe.

²⁸ Nambo une, kukunonyela kuŵandikana ni Mlungu; simicisye kuti kwa AMBUJE ni kwakutilila kwangu, tinjilalicila masengo gawo gosope.