Masalimo 72 - Chiyawo BibleLipopelo lyakumpopelela mwenye Salimo ja Solomoni 1 Ŵalakwe Mlungu, ampe mwenye lunda lwakulamulila mwakulungamika, ni amgaŵile cilungamo ca ŵalakwe, 2 kuti alamulile ŵandu ŵawo mwakulungamika ni kwalolela mwa cilungamo ŵandu ŵakulagasidwa. 3 Une ngupopela kuti cilambo cape ŵandu yakulya yejinji. Cilambo citende yeleyi mwa cilungamo, ligongo ŵandu ŵenu ali ŵagoloka. 4 Mwenye aŵe ŵakwacenjela ŵandu ŵakulaga, ŵakwakulupusya ŵandu ŵa usawuci, ni kwajonanga ŵandu wakwasawusya acimjawo. 5 Mwenye akole umi wawulewu, ndaŵi syosope pa likuŵala lyuŵa ni mwesi. 6 Aŵe mpela ula jejinji m'migunda ni mpela ula ja mawawa jijikwitila litaka. 7 Mtendele uŵe wejinji pa ndaŵi ja umi wakwe ni yindu yambone yakupocela ŵandu, kutyocela kwa Mlungu yitupe kwa yaka yosope. 8 Alamulile kutyocela nyasa jine mpaka ku nyasa jine; ni kutyocela ku lusulo lina yakwe Yufuleti mpaka kumbesi kwa cilambo capasi. 9 Amagongo ŵakutama mcipululu tacimjinamila jwelejo, amkunde mwenye kwapunda amagongo wakwe pa ngondo. 10 Ayimwene ŵa ku Talishishi ni ŵa myilumba tacipeleka mituka; ayimwene ŵa ku Sheba ni Seba tacipeleka mituka. 11 Ayimwene wosope tacimtindiŵalila, ni mitundu josope ja ŵandu tijicimtumicila jwalakwe. 12 Pakuŵa tacimkulupusya jwakusoŵa jutacigumilajo, ni jwakulaga jwangali ŵakumkamucisya. 13 Jwalakwe tacatendela canasa wangali macili ni ŵakulaga, taciwukulupusya umi ŵa ŵandu ŵakusingalilwa. 14 Tacikulupusya umi wawo ku ŵandu ŵawukali ni ŵakwasawusya, pakuŵa miasi jawo jili ja mtengo wapenani pameso pawo. 15 Akole umi wawulewu mwenye! Apocele golidi* jwa ku Sheba; ŵandu ampopelele ndaŵi syosope; ampopelele kuti akoleje upile! 16 Mcilambomo muŵe yakulya yejinji; atamose pacanya pa matumbi paŵe yakulya yejinji. Yisogosi yakwe yitupe mpela ya ku Lebanoni, ŵandu aŵe ŵajinji mu msindamo mpela manyasi ga kwitinji. 17 Lina lyakwe likaliŵalicika kwa yaka yosope, kupikanika kwakwe kuŵe citamile mpela mulikutamila lyuŵa. Ŵandu apate upile ligongo lya mwenyejo, ŵandu ŵa mitundu josope ajile kuti ŵana upile. 18 Acimbicikwe AMBUJE,* Mlungu jwa Aisilayeli, jwakutenda yindu yakusimonjeka jikape. 19 Mlilumbe lina lyawo lya lumbili kwa yaka yosope; cilambo cosope cigumbale ni lumbili lwawo. Elo yiŵe myoyo! Elo yiŵe myoyo! 20 Aji ni mbesi ja mapopelo ga Daudi* mwanace jwa Yese. |
Chiyawo Bible: Buku Jeswela © Bible Society of Malawi, 2014
Bible Society of Malawi