Masalimo 71 - Chiyawo Bible

Lipopelo lya mundu jwamcekulupe

¹ Une ngutilila kwa ŵalakwe, AMBUJE;* akasandendesya soni.

² Nambo ambokasye ni kungulupusya, ligongo Ŵalakwe ali ŵagoloka.

³ Ŵalakwe aŵe lwala lwangu kwakutilila; ni lipupa lyangu lyakulimbangana lyakulupucila, pakuŵa Ŵalakwe ali lwala ni lipupa lyangu.

⁴ Ŵalakwe Mlungu jwangu ambokasye, kutyocela m'makono mwa ŵakusakala, ni mwa mundu jwangalumbana ni jwakalalisya.

⁵ Ngusaŵika cembeceyo cangu mwa ŵalakwe AMBUJE Ŵamaciligosope; Mbele ndili mkwakulupilila ŵalakwe kutyocela ndaŵi josope ja ucanda wangu.

⁶ Mbele ndili mkwegamila pa ŵalakwe umi wangu wosope; Ŵalakwe anjinjilicisye kutyocela lisiku linapagwile Tinjalumba ŵalakwe ndaŵi syosope.

⁷ Umi wangu uŵele cisyasyo kwa ŵandu ŵajinji; ligongo lyakuti ŵalakwe aŵele ali jwakunjinjilicisya jwangu jwamacili.

⁸ Lisiku lyosope ngusinalumba ŵalakwe, pakulalicila ya lumbili lwawo.

⁹ Akasanjasa une pa ndaŵi ja ucekulu wangu; akanjasa pa ndaŵi ajino jakuti macili gangu gamasile.

¹⁰ Pakuŵa amagongo ŵangu akuŵeceta ya une; ŵandu ŵakuwusosa umi ŵangu akulangana ya ciswamba cakumbulaga une.

¹¹ Akuŵecetaga kuti, “Mlungu amlesile jika, kwende tumtoposye ni tukamkamule, pakuŵa pangali jwalijose jutampokasye.”

¹² Ŵalakwe Mlungu, akatalikangana none. Ajanguye kukungamucisya Ŵalakwe Mlungu!

¹³ Ŵandu ŵakundanda une apundidwe ni konanjidwa, ŵele ŵakusosa kumbweteka atende soni ni kunyosyeka.

¹⁴ Nambo une tinakulupilile ŵalakwe kwa yaka yosope, ni ngasindeka kwalumba ŵalakwe.

¹⁵ Pakamwa pangu tipaŵecete ya masengo gawo gambone; ya yitendo ya cikulupusyo cawo lisiku lili lyose, pakuŵa ngingumanyilila winji wakwe.

¹⁶ Ni macili ga AMBUJE Mlungu tinjijawula; Tinjijenesya ya umbone wa ŵalakwe jikape.

¹⁷ Ŵalakwe Mlungu, anjiganyisye une kutandilila ucanda wangu, ni ngulalicilape ya masengo gawo gakusimonjeka.

¹⁸ Myoyo Ŵalakwe Mlungu akandeka jika, mpaka pitinjilalicila ya macili gawo kwa yisukulu yosope yakwisa msogolo. Atamose ndili jwa mcekulupe, uli sili mbuu.

¹⁹ Kulungamika kwa ŵalakwe Mlungu, kukwika kwinani. Ŵalakwe atesile yindu yekulungwa; pangali soni jwine jwakulandana ni ŵalakwe.

²⁰ Ŵalakwe ŵaŵambonesye yisawusyo yejinji, nambo ŵalakwe tacimba soni macili, ŵalakwe tacingoposya soni mwisimbo lyakusokoka.

²¹ Ŵalakwe tacinjonjecesya ucimbicimbi wangu, ni kundulasya soni une.

²² Tinjalumba ni cida cakwimbila ca ngonji ligongo lyakukulupicika kwawo, Mlungu jwangu. Tinjijimba nyimbo syakwalumba ŵalakwe ni cida cakwimbila ca ngonji, ŵalakwe ŵaswela ŵa Isalaeli.

²³ Pakamwa pangu tipacigumila mwakondwa, pingwajimbila nyimbo syakwalumba ŵalakwe. Mtima wangu ŵawukulupwisye, myoyo tinjijimba ni kwalumba ŵalakwe.

²⁴ Tinjiŵeceta masiku gosope ya kulungamika kwawo, ligongo uŵasosaga kundendela yakusakala, atesile soni, ni kujigala mcesela.