Masalimo 7 - Chiyawo Bible

Lipopelo lyakuŵenda kulamula kwa kulungamika

Salimo ja Daudi, jiŵajimbile AMBUJE pakwamba ya Mkushi jwa lukosyo lwa Benjamini.

¹ AMBUJE,* Mlungu jwangu, ngutilila kwa ŵalakwe kuti anjenjele. Angulupusye kwa wosope wakundoposya.

² Ni mkaŵa kungwekwelemya mpela lisimba, mpaka ku malo kukuli kwangali jwine jwakumbokasya, ni kweleko tacimbaculanya.

³ AMBUJE, Mlungu jwangu, naga namlemwecesye mundu jwalijose,

⁴ naga namwucisye mjangu cangalumbana, mwine nasumwile yindu ya m'magongo jwangu pali pangali ligongo kose, naga niyitesile yindu yeleyi,

⁵ amkunde m'magongojo kuti andoposye une ni kungamula, ni amkunde kuti andiŵatile pasi, ni kundeka mluwundu ndili jwam'we.

⁶ Ajimuce, mwa ukali ŵalakwe AMBUJE, ajime ni kulimbana ni ukali wa amagongo ŵangu. Ajimuce mwamacili, Mlungu jwangu, pakuŵa ŵalakwe akusosa cilungamo.

⁷ Ŵasonganye pampepe ŵandu wa mitundu josope kwa ŵalakwe, ali atemi pa citengu cawo capenani.

⁸ AMBUJE akusalamula ŵandu wosope, Andamule une AMBUJE, mwakulingana ni goloka kwangu ni mwakulingana ni kulupicika kwangu.

⁹ Ayimasye yitendo ya ŵandu ŵakusakala, nambo ŵandu ŵagoloka, ŵape yindu yambone, Ŵalakwe ŵakumanyilila nganisyo sya mu mtima mwa ŵandu, ŵalakwe Mlungu ali ŵagoloka.

¹⁰ Mlungu ni jwakunjinjilicisya jwangu, jwakwakulupusya ŵagoloka mtima.

¹¹ Mlungu ali jwakulamula jwakulungamika ni Mlungu jwakupeleka cilango kwa ŵangalumbana masiku gosope.

¹² Naga mundu ngakupitikuka mtima Mlungu tacinola upanga wakwe, tacikunga ni kuwuta ukunje wakwe.

¹³ Alinganyisye yida yakogoya, aŵisile mipamba jamoto pa ukunje wakwe.

¹⁴ Yakuwona kuti, mundu jwakusakala akusaganicisya yangalumbana, ndaŵi syosope akuganisya yakupasulanya, akwisa ni unami ndaŵi syosope.

¹⁵ Akusasola lisimbo kuti ŵane agwilemo, m'malo mwakwe msyene pejo ni jwakusagwila mwisimbomo.

¹⁶ Yitendo yakwe yangalumbana yikumwujila msyene, ni ukoleko wakwe tiwumpwetece msyene pejo.

¹⁷ Ngusinatogolela AMBUJE ligongo lyakuti ali ŵakulungamika, tinjijimba nyimbo syakwalumba AMBUJE, Jwakwinani Mnope.