Masalimo 69 - Chiyawo Bible

Kulila kwa kuŵenda cikamucisyo

Kwa jwakwimbisya nyimbo. Pakukuya wimbe wa nyimbo jakuti: Akakombo. Salimo ja Daudi.

¹ Ŵalakwe Mlungu, angulupusye; pakuŵa mesi gayice mlukosi.

² Nditimile m'matope mwakusokoka; mwa muli mwangali pakuliŵata pakulimba, Njinjile m'mesi gakusokoka, nipo matumbela gandiŵisye.

³ Mbesile ni kulila kwangu, kungulo kwangu kujumwile. M'meso mwangu mutesile cipi pakulindilila cikamucisyo ca Mlungu jwangu.

⁴ Ŵandu ŵakumbenga pangali ligongo atupile kusipunda umbo sya mu mtwe mwangu. Ŵandu ŵakusaka kunjonanga ali ŵamacili, ŵakutenda ya ukoleko ni kulambucisya ya unami. Ŵandesile mbusye yindu yimkaninjiŵa. Ana komboleka kuwusya yindu yimkaninjiŵa?

⁵ Ŵalakwe Mlungu akumanyilila kuloŵela kwangu; yakulemwa yangu nganiyiŵa yakusisika pameso pawo ŵalakwe.

⁶ Ŵalakwe, AMBUJE* Mlungu Jwamaciligosope, akakunda kuti natesye soni ŵandu ŵakwakulupilila ŵalakwe. Ŵalakwe Mlungu jwa Isalaeli, akakunda kuti ŵandu ŵakwalambila ŵalakwe anyosyece ligongo lya une.

⁷ Pakuŵa anyosisye, ligongo lya ŵalakwe ngope jangu jikamwilwe ni soni.

⁸ Kwa acalongo acimjangu nguwoneka mpela mlendo, ni ŵanace ŵa acanasi ŵangu akundenda une jwakwika.

⁹ Pakuŵa citema cingusajitendela Nyumba ja ŵalakwe kukunjoca mu mtima mpela moto. Ni cipongwe ca ŵandu ŵele ŵakwajalusya ŵalakwe cingwilile une.

¹⁰ Pinalisile ni kulijima yakulya, ŵandu ŵaliji mkunyosya une.

¹¹ Pinawete cisaka kulosya kudandawula, nagambile kuŵa mpela cindu cakwasecesya jemanjajo.

¹² Ŵandu ŵakutama pa yipata, akungamba une, nombe nayo yidakwa yikunjimba nyimbo.

¹³ Nambo une ngupopela kwa ŵalakwe AMBUJE. Anjanje lipopelo lyangu pa ndaŵi jakwe jambone, Anjanje ligongo lya canasa cawo cacikulungwa, pakuti ŵalakwe akusasunga cilanga* cawo cakulupusya.

¹⁴ Angulupusye kuti ngatitimila m'matope, ambokasye kwa amagongo ŵangu ni kumesi gakusokoka mnope.

¹⁵ Akakunda kuti cikumba ca mesi cinjigale, kapena kuti nyasa jakusokoka jimile une, akakunda kuti lilembe lisiŵe kukamwa kwakwe lili limisile une.

¹⁶ Anjanje, AMBUJE, pakuŵa cinonyelo cawo cili cangamala; ambikane une, ligongo lya canasa cawo cili cacikulungwa.

¹⁷ Akasisila ngope jawo une jwakutumicila jwawo, ajanguye kukungamucisya, pakuŵa ndili myisawusyo.

¹⁸ Asejelele ciŵandika ni kuwombola une, angulupusye kwa amagongo ŵangu.

¹⁹ Ŵalakwe akumanyilila mwele ŵandu mwakunyocesya, akundesya soni ni kunjembulusya, amagongo ŵangu wosope ŵalakwe akwamanyilila.

²⁰ Mtima ŵangu ukasice ligongo lya yipongwe yingupocela, myoyo njasile mtima. Nasosilesosile ŵane ŵakuti andendele canasa nambo paliji pangali amta jumo. Nasosilesosile soni ŵane ŵakuti asangalasye nambo nganinamsimana amta jumo.

²¹ Ŵambele ndulu kuti ciŵe cakulya cangu, ni ŵamwesisye finyo jwecesuce pijangwete une njota.

²² Yakulya yawo yigalawuce kuŵa mpela ngonji syakwatanjisya. Atanjile ni yindimba ya mbopesi syawo.

²³ M'meso mwawo mutende cipi kuti akalola, mciwunu mwawo mutetemele kwangalecesya.

²⁴ Ŵagwicisye ukali wawo jemanjajo; ni moto wawo wa ukali ŵagwile jemanjajo.

²⁵ Pakutama pawo jemanjajo paŵe lisame, m'matenti mwawo mukasimusigala mundu.

²⁶ Jemanjajo akusamsawusya mundu jwamasile ŵalakwe kumputa kala; ni jwamasile kumpweteka ŵalakwe, jemanjajo akumjonjecesya kumsawusya.

²⁷ Ŵajonjecesye jemanjajo yisawusyo pa yisawusyo yijakwe, ni akawoneka kuti ŵangali magambo pameso pa ŵalakwe.

²⁸ Ŵasimasye m'buku ja ŵandu ŵacijumi; akasiŵalemba pampepe ni ŵandu ŵagoloka.

²⁹ Nambo une ngulaga, soni ndili myipwetesi; anyakule ŵalakwe Mlungu, kuti ngulupuce.

³⁰ Tinjimlumba Mlungu pakwajimbila nyimbo, tinjilalicila ya ukulu wawo pakwatogolela.

³¹ Yeleyi tiyicasangalasya AMBUJE kujipunda mbopesi ja ng'ombe, atamose ng'ombe sya mikambako syana misengo.

³² Ŵakulaga asangalale pitayiwone yeleyi; jemanja ŵimkulambila Mlungu, mlimbe mtima.

³³ Pakuŵa AMBUJE akwapikana ŵakulaga, ngakwacembulusya ŵandu ŵakwe ŵataŵidwe ni unyolo.

³⁴ Yakwinani ni ya cilambo capasi, nyasa ni yosope yayikwenda mwelemo yalumbe Ŵalakwe.

³⁵ Pakuŵa Mlungu tacikulupusya Siyoni* ni kutaŵa soni misinda ja Yuda. Ŵandu ŵakwe tacitama kukoko ni ticiciŵa cilambo cawo;

³⁶ yisukulu ya ŵakutumicila ŵakwe nombe nawo tacicipocela kuti ciŵe cawo; ni wosope ŵakumnonyela Mlungu tacitama m'momo.