Masalimo 68 - Chiyawo Bible

Nyimbo ja lukosyo jakusangalalila kupunda pa ngondo

Kwa jwakwimbisya nyimbo. Salimo ja Daudi. Nyimbo.

¹ Ajimuce Mlungu, amagongo ŵakwe wosope apwilingane, wosope ŵakuŵengana najo, atile pameso pakwe.

² Mpela lyosi palikuwululuka ni mbungo, nambo soni mpela sela mwakusanyelenyenducila ni moto myoyo soni ŵajonanje ŵandu ŵakusakala pameso pa Mlungu.

³ Nambo ŵagoloka asangalale, ajangale pameso pa Mlungu, ni asecelele naco cisangalalo.

⁴ Mumjimbile Mlungu, mjimbe nyimbo syakulilumba lina lyawo. Mjimbe nyimbo, mwakwesya maloŵe, syakwalumba Ŵelewo ŵakwenda m'mawunde. Lina lyawo ali AMBUJE* mjangale pameso pakwe.

⁵ Atati ŵa ŵanace ŵa masije ni ŵakwacenjela acakongwe ŵamasije* ali AMBUJE, ŵakutama ku malo gawo gamaswela.

⁶ AMBUJE akwapa malo ŵandu ŵakusoŵa malo gakuti atameje; akwakoposya ŵandu ŵali mu ukayidi kuti aŵe pa mtendele, nambo ŵakwimucilawo akwatopolela ku cilambo cacijumu cangali mesi.

⁷ Piŵalongolelaga ŵandu ŵawo, ŵalakwe AMBUJE, piŵajendaga mcipululu mula,

⁸ cilambo capasi catenganyice, kwiwunde kwagwisisye ula ligongo lyakwika kwawo ŵalakwe Mlungu. Litumbi lya Sinayi lyatenganyice ligongo lya kwisa kwawo ŵalakwe Mlungu jwa Aisalaeli.

⁹ Ŵalakwe Mlungu Ŵagwisisye ula jakwanila pa cilambo. Ŵacilimbice cilambo cakwinjila ŵandu ŵawo, picaliji cangali macili.

¹⁰ Ŵandu ŵawo ŵapatile malo gakutama. Ŵalakwe Mlungu mwa umbone wawo, ŵapele ŵandu ŵa ulanda yakusoŵa yawo.

¹¹ Ŵalakwe Ŵalamwile ŵandu, nipo acakongwe ŵajinji ŵayice ni utenga wakuti:

¹² “Ayimwene ni ŵa ngondo ŵawo akutila!” Acakongwe ŵali kumusi ŵagaŵene yindu yiyasumulidwe ku ngondo:

¹³ Yakujigala ku ngondoyo yikuwoneka mpela ngunda syana mang'omba ga silifa,* ni mapapiko gakwe ga golidi* jwakunyesimila. (Ana ligongo cici ŵane mwa jemanja mwasigalile pasikati pa macinga pa lisiku lya ngondo?)

¹⁴ Mlungu Jwamaciligosope, piŵatopwele ayimwene Kwitumbi lya Salimoni, jwalakwejo ŵakutendekasisye kuti kusisime mnope.

¹⁵ Litumbi lya Bashani lili lya lumbili soni lili litumbi lyalikwete songa syejinji!

¹⁶ M'mwe litumbi lya songa syejinji, ana ligongo cici mkulolecesya mwa wiwu litumbi liŵalisagwile Mlungu kuti atameje? AMBUJE tacitama mwelemo mpaka kalakala.

¹⁷ AMBUJE ŵayice ku malo gawo gamaswela kutyocela ku Sinayi, ali ni mageleta gamacili gamajinji.

¹⁸ Ŵalakwe ŵakwesile kwinani mnope, ali ŵajigele acikayidi ŵajinji, ŵapocele mituka mwa ŵandu, atamose kwa ŵandu ŵakwajimucila, kuti AMBUJE Mlungu akatame nawo kweleko.

¹⁹ Acimbicikwe AMBUJE, ŵakusatwicila yakusawusya yetu lisiku ni lisiku; jwalakwejo ali Mlungu jwakutukulupusya uwe.

²⁰ Mlungu jwetu ali Mlungu jwakutukulupusya, ali AMBUJE, AMBUJE wetu ŵele ŵakusatukulupusya ku ciwa.

²¹ Nambo Mlungu tacikasanya mitwe ja amagongo ŵawo; mitwe ja ŵandu wosope ŵakwenda muyakusakala.

²² AMBUJE ŵatite, “Tinjawusya amagongo ŵenu kutyocela ku Bashani, tinjawusya kutyocela ku nyasa jakusokoka,

²³ kuti mcape sajo syenu m'miasi; ni kuti m'mbwa syenu silapite miasi ja amagongo ŵenuwo.”

²⁴ Wende ŵawo Mlungu ŵakucimbicika, awuweni ŵandu wosope, wende wa Mlungu jwangu, mwenye jwangu, pakwinjila kumalo gawo gamaswela.

²⁵ Ŵakwimba nyimbo ali alongolele, ŵagomba yida yakwimbila ya ngonji acikuyaga munyuma, aciŵali ŵakugomba ngoma ali pasikati.

²⁶ “Mumlumbe Mlungu mu msongano waukulungwa, mwalumbe AMBUJE jemanja yisukulu ya Isalaeli.”

²⁷ Pasogolo, ukulongolela mtundu ŵa ŵandu ŵa Benjamini, jwamnondi jwa jemanjajo. Acakulungwa ŵa Yuda ali mkukuya panyuma pampepe ni ŵapanganya wawo. Acakulungwa ŵa Sebuloni ni acakulungwa ŵa Nafutali ŵakuyaga munyuma mwawo.

²⁸ Ŵalosye ŵandu ŵawo kuti ŵalakwe Mlungu ali macili ga ŵatumicile m'malo mwetu.

²⁹ Kwa ligongo lya nyumba jawo ja mu Yelusalemu ayimwene tayice ni mituka kukwapa ŵalakwe.

³⁰ Ayijamuce yilombo yila yayikutama m'matete, mpingo wa ng'ombe sya mkambako pampepe ni tuŵanace twa ng'ombe twa ŵandu ŵa ngosyo. Mwaliŵatile pasi ŵele ŵakusasisaka mbiya mwakusakala. Mwapwilinganye ŵandu ŵakujinonyela ngondo.

³¹ Acakulungwa taciyika kutyocela ku Iguputo, Ifiyopiya tacikangamala kulipeleka kwa ŵalakwe. Tacikwesya makono gawo kwa Mlungu.

³² Mumjimbile Mlungu nyimbo, jemanja ayimwene ŵa cilambo capasi. Jimbani nyimbo syakwalumba AMBUJE.

³³ Mlungu jwakusajenda mwinani, mwinani mwakalakala. Mpikane liloŵe lyakwe, liloŵe lyakwe lyakubangula mwamacili.

³⁴ Jiticisyani kuti Mlungu ali jwamacili. Ucimwene wakwe uli pa Isalaeli, macili gawo gali kwinani.

³⁵ Mlungu ali jwagoloka m'malo gakwe gamaswela, Mlungu jwa Isalaeli ni jwakupeleka macili ni kwalimbisya ŵandu ŵakwe. Acimbicikwe Mlungu!