Masalimo 67 - Chiyawo Bible

Nyimbo jakutogolela

Kwa jwakwimbisya nyimbo. Salimo jakwimbila yida yakwimbila ya ngonji. Nyimbo.

¹ Atutendele canasa Mlungu, ni kutupa upile, atumulicile ni cinonyelo cawo.

² Litala lyawo limanyice pa cilambo capasi, macili gawo gakulupusya gamanyice kwa mitundu josope.

³ Mitundu ja ŵandu jalumbe Ŵalakwe Mlungu, mitundu josope ja ŵandu jalumbe ŵalakwe.

⁴ Mitundu ja ŵandu jisangalale ni kwimba mwakondwa, pakuŵa ŵalakwe akusiŵalamula ŵandu mwa mwakulungamika, ni kwalongolela pa cilambo capasi.

⁵ Mitundu josope ja ŵandu jalumbe ŵalakwe Mlungu. Mitundu josope ja ŵandu jalumbe ŵalakwe.

⁶ Cilambo cisogwesye yisogosi yakwe, Mlungu, Mlungu jwetu atupele upile.

⁷ Mlungu atupele upile, ŵandu wosope ŵa pa cilambo capasi ŵacimbicisye ŵalakwe.