Masalimo 66 - Chiyawo Bible

Nyimbo ja malumbo ni kutogolela

Kwa jwakwimbisya nyimbo. Nyimbo. Salimo.

¹ Mumlumbe Mlungu pakwimba nyimbo syakondwa, jemanja ŵandu wosope ŵa pa cilambo capasi.

² Jimbani nyimbo sya kulilumba lina lyawo lya lumbili. Mwalumbe mwa ucimbicimbi.

³ Msale kwa Mlungu kuti, “Masengo gawo gali gakusimonjeka. Macili gawo gali gamakulungwa kwakuti amagongo ŵawo akwajinamila ŵalakwe ni woga.

⁴ Ŵandu wosope ŵa pa cilambo capasi akwalambila, akwajimbila nyimbo syakwalumba Ŵalakwe, akwajimbila nyimbo syakulilumba lina lyawo.”

⁵ Myice, mlole yatesile Mlungu, masengo gakwe gali gakusimonjeka pasikati pa ŵandu.

⁶ Ŵajijumwisye nyasa kuŵa mkuli wejumu; ŵandu ŵajombwece lusulo lula acijendaga pasi. Ni ligongo lyakwe tumsangalalile Jwalakwe.

⁷ Jwele jwakulamula mwamacili gakwe kwa yaka yosope, meso gakwe gakulolecesya kwa ŵandu ŵa ngosyo, ŵandu ŵakwimucila akalikwesya.

⁸ Mumcimbicisye Mlungu jwetu, jemanja mitundu josope ja ŵandu, maloŵe gakwalumba gapikanice.

⁹ Jwalakwe awucenjele umi wetu, nganakunda sajo syetu sitelesye.

¹⁰ Ŵalakwe Mlungu, ŵatulinjile uwe; ŵalakwe ŵatulinjile uwe mpela mwakulinjila silifa.*

¹¹ Ŵalakwe ŵatujinjisye mlwawu lwa amagongo, ŵatutwicile katundu jwa usito pa migongo jetu.

¹² Ŵalakwe ŵakundile amagongo atukwele pa mitwe, twajinjile m'moto ni m'mesi, nambo ŵalakwe atuyicisye ku malo gambone.

¹³ Tinjiyika m'Nyumba jawo ni mbopesi syakoca, tinjiyitenda yinayilumbilile kwa ŵalakwe.

¹⁴ Maloŵe ginaŵecete pakamwa pangu; soni yele yinayitesile cilanga,* pa ndaŵi jinaliji myisawusyo.

¹⁵ Tinjipeleka kwa ŵalakwe mbopesi syakoca sya nyama syakunakana; Tinjipeleka mbopesi sya ng'ombe ni mbusi, lyosi lya mbopesi sya ngondolo tiliciyika kwa ŵalakwe.

¹⁶ Myice ni mpikanile, jemanja wosope ŵimkumjogopa Mlungu, tinjimsalila yosope yandendele une.

¹⁷ Nagumisile pakwalilila ŵelewo, nipo nalumbile ni pakamwa pangu.

¹⁸ Naga ngacisecelele cakusakala ni kucisisa mu mtima mwangu; AMBUJE* ngimkanambikana kose.

¹⁹ Nambo Mlungu ambikene, agasamalile maloŵe ga lipopelo lyangu.

²⁰ Acimbicikwe Mlungu ligongo nganalikana lipopelo lyangu, nginatyosya cinonyelo cawo cangamala pa une.