Masalimo 65 - Chiyawo Bible

Malumbo ni kutogolela

Kwa jwakwimbisya nyimbo. Salimo ja Daudi. Nyimbo.

¹ Kuli kwakwenela uweji kwalumba ŵalakwe Mlungu, ku Siyoni;* ni kutenda yitwalumbile kwene kwa ŵalakwe.

² Ŵalakwe ŵakupikana lipopelo, ŵandu wosope taciyika kwa ŵalakwe,

³ ligongo lya ulemwa* wawo. Payikututupila yakulemwa yetu, ŵalakwe akutukululucila.

⁴ Jwana upile mundu jwamsagwile ŵalakwe ni kwika najo kutama mu nganya jawo. Tucijikuta ni yindu yambone ya m'Nyumba jawo Nyumba jawo jajiswela.

⁵ Myitendo yawo yakusimonjeka ŵalakwe akusatujanga ŵatujanjile uwe ni kutujokola, ŵalakwe Mlungu mkulupusyo jwetu. Ŵandu ŵa cilambo cosope capasi ni soni ŵapesi nyasa syakutalicila, wosopewo akusiŵakulupilila ŵalakwe.

⁶ Ŵalakwe mwamacili gawo akugatamika matumbi, kulosya kuti ŵalakwe akwete macili.

⁷ Ŵalakwe ŵakutendesya bata nyasa ni matumbela gakukukuma, ni lisegwe lya ŵa ngosyo sine.

⁸ Ŵandu ŵakutama m'malile ga cilambo ca kwanawula, akusajogopa yimanyililo yawo yakusimonjeka, ŵandu akugumila mwakusangalala ligongo lya yitendo yawo yambone, kutandila kundanda mpaka kumbesi kwa cilambo.

⁹ Ŵalakwe akusalosya cisamalilo cawo pa cilambo capasi pakucipa ula, akusacitendekasya kuti ciŵe ca cajila. Akusagumbasya sulo ni mesi; Akusamelesya mbeju pa yilambo. Amu ni mwakusatendela ŵalakwe.

¹⁰ Ŵalakwe akusatumisya ula jejinji m'migunda jelime nikuŵa kuti mwana cinyesi, akusajoloŵesye litaka ni miwumbi, ni kutendekasya kuti mbeju sya mwana sikule.

¹¹ Kumbesi kwa caka akusapeleka yagowola yejinji mwa umbone wawo. Kulikose kwakwawula ŵalakwe kwana yagowola yejinji.

¹² Atamose ku cipululu kukumela mopo wejinji, ni matumbi gakusagumbala ni lukondwa.

¹³ Malambo gagumbele ni yilangwa, ciŵata nombe naco cigumbele ni yakulya, yosopeyi yikugumila ni kwimba pampepe mwakondwa.