Masalimo 64 - Chiyawo Bible

Lipopelo lyakuŵenda citetelo

Kwa jwakwimbisya nyimbo. Salimo ja Daudi.

¹ Agapikane maloŵe gangu, ŵalakwe Mlungu, pingwadandawulila. Awucenjele umi ŵangu kwa m'magongo jwakogoya.

² Anjinjilicisye une ku ŵandu ŵaciswamba, anjinjilicisye ku likuga lya ŵandu ŵakusakala.

³ Akusanola malulumi gawo mpela mawupanga, akusaŵeceta maloŵe gakusoma mwakupweteka mpela mipamba.

⁴ Akwajuŵilila ŵandu ŵangalemwa; akusiŵajuŵilila ŵandu ni kwasoma mwacisisimucisya ni mwangajogopela.

⁵ Akusalimbisyana pakupangana kutenda yangalumbana; akusapangana yakutega malwawu mwakusisika kuti jwine atanjilemo; acitiji, “Tatuwone ŵani?”

⁶ Akusatenda ma pulani gakusakala acitiji kuti, “Uwe tuganisisye mwakalamuka cele ciswambaci.” Mtima ni nganisyo syamkati ni lisosa lya mundu yili yakusisika.

⁷ Nambo Mlungu tacaponyela jemanjajo mipamba; taciwulala mwangajembeceya.

⁸ Tacajonanga ligongo lya yiŵeceto yawo, wosope ŵitacawona jemanjajo, tacipukunya mitwe jawo.

⁹ Ni ŵandu wosope tacitenda woga, tacijenesya yayitesile Mlungu, ni taciyiganicisya yayitesile Mlungujo.

¹⁰ Wosope ŵagoloka asangalale ligongo lya AMBUJE,* ni kutilila kwa jwalakwe. Ŵandu ŵambone mtima tacalumba AMBUJE.