Masalimo 63 - Chiyawo Bible

Kumsosa mnope Mlungu

Salimo ja Daudi, pandaŵi jiŵaliji mcipululu ca Yuda.

¹ Ŵalakwe Mlungu, ali Mlungu jwangu, ngusinasosasosa ŵalakwe. Umi ŵangu ukwete njota jakwasosa ŵalakwe, cilu cangu cikwasacilila ŵalakwe, mpela cilambo cacijumu ni cangali mesi.

² Ngukumbila ndili naweni ŵalakwe, pa malo gawo gamaswela, ni kugawona macili gawo ni lumbili lwawo.

³ Tinjalumba, ligongo cinonyelo cawo cili cambone kuwupunda umi.

⁴ Myoyo tinjatogolela masiku gosope ga umi wangu. Tinjikwesya makono gangu kwa ŵalakwe pakupopela.

⁵ Tinjijikuta mpela mundu jwampele yakulya yejinji pa cindimba, ni tinjalumba ni maloŵe gakusengwa.

⁶ Pandaŵi jingonile pa cindanda ngusaganisya mnope ya ŵalakwe ngusaganicisya ya ŵalakwe cilo cosope.

⁷ Pakuŵa ŵalakwe ali ŵakungamucisya ŵangu myoyo ngwimba mwakondwa kusi kwa mapapiko gawo.

⁸ Umi ŵangu ukukanilila kwa ŵalakwe, mkono wawo wamlyo ukunjenjela.

⁹ Nambo ŵandu ŵakusosa kuwujonanga umi wangu, tacijinjila ku cilambo ca ŵandu ŵawe.

¹⁰ Jemanjajo tacapeleka kuti akawulajidwe ku ngondo, myoyo taciŵa yakulya ya makule.

¹¹ Nambo mwenye tacisengwa mwa Mlungu; wosope ŵakulupilila mwa Mlungu, tacimlumba jwalakwejo; pakuti tacipawugala pakamwa pa ŵandu ŵa unami.