Masalimo 62 - Chiyawo Bible

Kulupilila citetelo ca Mlungu

Kwa jwakwimbisya nyimbo. Pakukuya wimbe wa Yedutuni. Salimo ja Daudi.

¹ Umi ŵangu ukutama jii kwajembecela, pakuŵa cikulupusyo cangu cikutyocela kwa jwalakwe.

² Jwalakwe pejo ali lwala lwangu, cikulupusyo cangu, ni ŵakunjenjela ŵangu; une ngasindenganyika kose.

³ Ana jemanja wosope timcimjimucila mundu mpaka cakaci kuti mumgwisye mpela lipupa lyependece ni mpela lipupa lyakutenganyika?

⁴ Cakulinga cawo cili cagambakusosa kumgwisya pa malo gakwe ga ucimbicimbi. Akunonyela kuŵeceta ya unami. Akusapeleka upile wa pakamwape, nambo mu mtima mwawo akusalwesa.

⁵ Umi ŵangu ukutama jii kumjembeceya Mlungu, pakuŵa cikulupi cangu cikutyocela kwa jwalakwe.

⁶ Jwalakwe jika ali lwala lwangu ni cikulupusyo cangu, ali ŵakunjenjela ŵangu ngasindenganyika kose.

⁷ Cikulupusyo ni lumbili lwangu, yosopeyo yili mwa Mlungu. Mlungu ali lwala lwangu lwamacili, ni kwakutilila kwangu.

⁸ Ŵandu ŵangu, mumkulupilileje Mlungu ndaŵi syosope. Mumsalileje jwalakwejo yakusawusya yenu yosope, pakuti jwalakwejo ali kwakutilila kwetu.

⁹ Ŵandu ŵakumanyika cenene ni ŵandu ŵangamanyika wosopewo ali mpela mpweya; Mwaŵice pasikelo ni timsimane kuti wosopewo ŵangali usito ali ŵakwalukangana kuwupunda mpweya.

¹⁰ Mkakulupilila kuti ya ukoleko tiyimkamucisye. Mkasiganicisya kuti kwiŵa tikumpindulile, naga mkwete cipanje cejinji mkaŵika mtima wenu pa yeleyo.

¹¹ Kwa ndaŵi syejinji mbele ndili kumpikana Mlungu ali mkuŵeceta kuti macili gali ga jwalakwejo;

¹² nambo soni cinonyelo cakwe cili cangamala. Ŵalakwe jikape akusapeleka mbote kwa jwalijose mwakulingana ni masengo gapanganyisye.