Masalimo 60 - Chiyawo Bible

Lipopelo lyakuŵenda cikulupusyo

Kwa jwakwimbisya nyimbo. Pakukuya wimbe wa nyimbo jakuti: “Kakombo jwa Cilanga.” Salimo ja Daudi, jakwiganyicisya. Daudi ŵaliji ali aputile ngondo ni ŵandu ŵa ku Alamu Nahalimu ni ŵa ku Alamu Soba. Pelepo ni kuti Yowabu ali ŵajonasile Aedomu 12,000 ku Ciŵata ca Njete.

¹ Ŵalakwe Mlungu atujasile uwe, ŵajonasile ŵakutucenjela ŵetu, ŵalakwe atutumbilile, nambo sambano atuwucisye mwakala.

² Ŵalakwe acitenganyisye cilambo, ni cisukunya, ŵalakwe aciŵalulenye, amukolosye mumuŵalwicemo, pakuŵa cikutenganyika kwakogoya.

³ Ŵalakwe ŵalosisye ŵandu ŵawo yipwetesi yayikulungwa, ŵalakwe atumwesisye finyo kuti tulaje mnope ni tukupepeluka najo.

⁴ Ŵalakwe atukwecesye mbendela uwe ŵatukwajogopa ŵalakwe, kuti tusongangane pelepo pakutila ukunje wa ngondo.

⁵ Atukamucisye ni mkono wawo wamlyo, atujanje kuti uwe ŵakwanonyela ŵawo tukulupuce.

⁶ Mlungu aŵisile cilanga* ali pa malo gawo gamaswela kuti, “Tinjimgaŵila cilambo ca Shekemu mwakusengwa, tinjimlembela malile Ciŵata ca Sukoti.

⁷ Giliyadi ali jwangu, Manase ali jwangu; Efelemu ali mpela cisoti cangu cakulicenjela, Yuda ali mpela simbo jangu ja ucimwene.

⁸ Mowabu taciŵa mpela mbale jangu jakunaŵila. Edomu taciŵa pakuliŵata sapato syangu. Tinjigumila mwakondwa patinjapunda ŵandu ŵa ku Filisitiya.”

⁹ Tacinjigala ŵani ku msinda ukwete mapupa? Tacimbecesya ŵani ku Edomu?

¹⁰ Ana ŵalakwe Mlungu atujasile uweji kwene? Ana ngalongana nawo ŵandu ŵetu pangondo, ŵalakwe Mlungu?

¹¹ Atukamucisye pakulimbana ni amagongo ŵetu, pakuŵa cikamucisyo ca mundu cili cangali mate.

¹² Naga Mlungu akutama ni uwe, tuciputa ngondo mwakulimba mtima, pakuŵa Jwalakwe tacaliŵatila amagongo ŵetu.