Masalimo 59 - Chiyawo Bible

Lipopelo lyakuŵenda cikulupusyo

Kwa jwakwimbisya nyimbo. Pakukuya wimbe wa nyimbo jakuti: Mkajonanga. Salimo ja Daudi. Saulo ŵaliji ali ŵatumile ŵandu kukulindilila pa nyumba ja Daudi kuti amwulaje.

¹ Angulupusye kwa amagongo ŵangu, conde Mlungu jwangu, anjenjele kwa ŵandu ŵakunjimucila.

² Angulupusye kwa ŵandu ŵakutenda yangalumbana, angulupusye kwa ŵandu ŵakuwulaga acimjawo.

³ Alole akuwujuŵilila umi ŵangu, ŵandu ŵangalwe akamulene kuti atende ngondo ni uneji. Atamose nganindenda cakusakala kapena kulemwa kulikose;

⁴ Ŵalakwe AMBUJE,* atamose nganindemwa ŵanduwo akwanguya kuliŵicila cile ya ngondo.

⁵ Ajimuce ŵalakwe Mlungu Jwamaciligosope, alolecesye asyene ŵalakwe Mlungu jwa Isalaeli. Ajimuce kuti ŵape cilango ŵandu ŵa ngosyo sine; akasiŵaleka ni jumo jose jwa ŵele ŵandu ŵakunyenga ni ŵaciswamba.

⁶ Akusayika ligulo lililyose ali mkuguma mpela m'mbwa, mwakuŵa akwendajenda mu msinda.

⁷ Ngati awowo, ŵakutenda lisegwe mnopewo, akuŵeceta mwa ngalwe ni ngomo syawo. Pakuŵa akusati, “Tatupikane ŵani?”

⁸ Nambo Ŵalakwe AMBUJE akwaseka jemanjajo, Ŵalakwe akusiŵanyosya ŵandu ŵa ngosyo.

⁹ Ŵalakwe ali macili gangu; tinjajimbila nyimbo ja malumbo; pakuŵa ŵalakwe Mlungu ni ŵakunjenjela ŵangu.

¹⁰ Mlungu jwangu tacinjingamila ligongo ali jwa cinonyelo cangamala. Mlungu jwangu tacikunda kuti une sangalale, pakwawona amagongo ŵangu acilepelaga.

¹¹ Mkasimwawulaga, kogopela kuti atakuliŵalila ŵandu ŵangu. Mwapwilinganye ni macili genu, ni kwagwicisya pasi, ŵalakwe AMBUJE, ŵakutucenjela ŵetu.

¹² Atanjile ni kupoka kwawo, ligongo lyakulemwa kwa mkamwa mwawo, ni maloŵe ga ngomo syawo, ligongo akusalwesa ni kuŵeceta ya unami.

¹³ Ŵatumbilile, ni kwajonanga, ŵajonanje kuti akasawoneka soni, kuti ŵandu amanyilile kuti Mlungu akulamulila ku Isalaeli mpaka kumbesi kwa cilambo capasi.

¹⁴ Ŵandu ŵakusakala ŵala akusayika ligulo lili lyose, ali mkuguma mpela m'mbwa, akwendajenda mu msinda.

¹⁵ Akulijendelela kusosa cakulya mpela m'mbwa, akusadandawula naga nginajikuta.

¹⁶ Nambo une, tinjijimba nyimbo syakulumba macili gawo; tinjijimba kundaŵi mwakunyanyika maloŵe, nyimbo syakulumba cinonyelo cawo cangamala. Pakuŵa ŵalakwe ali ŵakunjenjela ŵangu, ni kwakutilila pa ndaŵi ja yisawusyo yangu.

¹⁷ Ŵalakwe ali macili gangu, tinjajimbila nyimbo syakwalumba; pakuŵa ŵalakwe Mlungu ali jwakunjenjela jwangu; Ŵalakwe ali Mlungu jwakundosya cinonyelo cangamala.