Masalimo 58 - Chiyawo Bible

Lipopelo lyakumŵenda Mlungu kuti ŵape cilango ŵandu ŵakusakala

Kwa jwakwimbisya nyimbo. Pakukuya wimbe wa nyimbo jakuti: Mkajonanga. Salimo ja Daudi.

¹ Jemanja ŵakulamula, ana mkusalamula mwakulungamika? Ana mkusimwalamula ŵandu mwagoloka?

² Iyayi m'mitima mwenu mkusaganicisya yangalumbana, kulamula kwenu kwangalondeka kukusatandisya ndewo.

³ Ŵangalumbana ali ŵasokonecele kutandilila ali mcitumbo mwa mama ŵawo, akusalemwa kutyocela ndaŵi jawo jakupagwa, akusaŵeceta ya unami.

⁴ Akwete ululu mpela wa lijoka mpela lipili lyangapikana lyalisiŵile m'mapikanilo mwakwe.

⁵ Mwakuti ngalikusapikana liloŵe lya kuŵilanga kwa mundu jwamatipwi, atamose jwa matipwi jwakwe aŵe jwakalamuka.

⁶ Ŵalakwe Mlungu, akuwule meno mkamwa mwawo, agatyosye meno gosope ga masimba gamwana, ŵalakwe AMBUJE.*

⁷ Ŵalece jemanjajo akasawoneka mpela mesi gagakujilima mnope, ŵalece aliŵatidwe mpela manyasi gamanyale.

⁸ Aŵe mpela ngonokono jajikusungunukula mesi pajikwenda, akaliwona lyuŵa mpela mwanace jwapite panapitape.

⁹ Mlungu ŵapyajile ni kwatyosya, mipika jenu mkanijikamule moto wa sasu sya miŵa, syasiŵisi kapena syejumu. Mlungu ŵapyajile ni kwatyosya.

¹⁰ Mundu jwagoloka tacisangalala pakukuwona kuwucisya mbusyo. Tacicapa sajo syakwe m'miasi ja ŵandu ŵakusakalawo.

¹¹ Ni ŵandu taciti, “Yakuwona ŵandu ŵagoloka akupocela mbote, kusyene apali Mlungu jwakulamula pacilambo capasi.”