Masalimo 56 - Chiyawo Bible

Lipopelo lyakulosya kulupilila mwa Mlungu

Kwa jwakwimbisya nyimbo. Pakukuya wimbe wa nyimbo jakuti: Njuŵa jitusile mu yitela ya mtundu yakutali. Salimo ja Daudi ja mtundu wa mikitamu. Afilisiti ŵaliji ali amkamwile ku Gati.

¹ Andendele canasa, ŵalakwe Mlungu, pakuŵa ŵandu akusawusya, amagongo ŵangu akundiŵatila ni kutenda ngondo lisiku lili lyose.

² Amagongo ŵangu akundiŵatila une lisiku lyosope, pakuŵa ali ŵajinji ŵakutenda ngondo ni une mwakulikwesya.

³ Pingutenda woga; ngusinakulupilila ŵalakwe.

⁴ Ngusinamlumba Mlungu ligongo lya yindu yambicile cilanga.* Ngusinamkulupilila Mlungu mwangali woga. Ana mundu mpaka andende cici?

⁵ Amagongo akusosa lisiku lyosope kundepelesya yinguganisya kuyitenda, yosope yakusaganicisya ni yakuti andendele yakusakala.

⁶ Akusongana m'malo mwakusisika kunjuŵilila akulolecesya kwenda kwangu, pakuŵa akusosa kumbulaga.

⁷ Myoyo ŵawucisye mbote ja kulemwa kwawo, ŵatumbilile ŵanduwo ni kwajonanga ŵalakwe Mlungu.

⁸ Ŵalakwe akuweni kupuluputa kwangu, akuweni kudandawula kwangu, ana yosopeyi nganayilemba m'buku jawo?

⁹ Pelepo amagongo ŵangu taciwujilila munyuma; pa lisiku litinjimŵilanga Mlungu, ngumanyilila kuti Mlungu ali kumbali jangu.

¹⁰ Ngwalumba AMBUJE* ligongo lya maloŵe gawo. Ngwalumba Ŵelewo ligongo lya yindu yambicile cilanga.

¹¹ Ngusakulupilila Mlungu, ngusindenda woga. Ana mundu mpaka andende cici?

¹² Ngwenela kuyitenda yele yinalumbilile kwa ŵalakwe Mlungu, tinjipeleka kwa ŵalakwe mbopesi jangu jakutogolela.

¹³ Pakuŵa ŵalakwe akulupwisye umi ŵangu ku ciwa, anjenjele sajo syangu kuti ngagwa, kuti njende pameso pa Mlungu, mu lilanguka lya umi.