Masalimo 55 - Chiyawo Bible

Lipopelo lyakuŵenda cikamucisyo

Kwa jwakwimbisya nyimbo. Ndakatulo ja Daudi, jakwimbila yida yakwimbila ya ngonji.

¹ Ŵalakwe Mlungu, apikane lipopelo lyangu, akajuŵa pingwaŵenda.

² Ambikane une, ni anjanje. Mtima wangu nganiwuŵa m'malo ligongo lya yisawusyo yangu.

³ Ngwasa mtima ligongo lya amagongo ŵangu akunjogoya, ligongo lyakuti ngusawusidwa ni kupondelesyedwa ni ŵandu ŵangalumbana. Akwika ni yisawusyo pa une; soni andumbilile ni kuŵengana ni une.

⁴ Mtima wangu ukupwetekwa mkati mwangu, yakogoya ya ciwa yingwilile.

⁵ Woga ni citetemelo yisimene, ungamwile woga wawukulungwa.

⁶ Natite, “Ngakole mapapiko mpela ga njuŵa, ningagulwice kwawula kwanawula kukupumula.

⁷ Elo, ngatilile kwanawula, ni kutama mcipululu.

⁸ Ngajangwiye kuja kupata malo gakuŵa mbungo ni cimbunga.”

⁹ Ŵalakwe AMBUJE,* asokonesye yiŵeceto ya amagongo ŵangu! Pakuŵa nguwona ŵandu ali mkukangana ni kutenda njojo mu msindamo,

¹⁰ musi ni cilo jemanjajo akugasyungulila mapupa gakwe, mu msindawo mwana masegwe ni ngondo.

¹¹ Mkati mwakwe mukonasika yindu, m'misika mwawo akwiŵilana.

¹² Yikaŵe kuti m'magongo jwangu ni jwakunyosya, ningapakombwele kupimilila; yikaŵe kuti m'magongo jwangu ni jwakundenda cipongwe, ningalisinjile.

¹³ Nambo m'mwejo mjangu, mbusanga jwangu ni mjangu jwakusyoŵekana najo; ni jwakundendela yeleyi.

¹⁴ Twaliji mkuŵeceta ngani syambone pampepe, twapopelaga pampepe m'Nyumba ja AMBUJE.

¹⁵ Wawo Mlungu akunde kuti ciwa casimane amagongo wangu, ŵakunde ajawule ku malembe ali cijumi. Pakuŵa yakusakala yigumbele m'mitima mwawo, ni m'majumba mwawo.

¹⁶ Nambo une ngwaŵenda, AMBUJE Mlungu kuti angamucisye ni tacingulupusya une.

¹⁷ Ngudandawula ni kulila ligulo, kundaŵi, ni musi, ŵalakwe tacigapikana maloŵe gangu.

¹⁸ Taciwukulupusya umi wangu ku ngondo jinguputa; pakuŵa ŵandu ŵajinji akukangana ni une.

¹⁹ AMBUJE ŵakutama pa citengu ca ucimwene wakwe kutandilila kala, taciputa ngondo, tacatulusya amagongo ŵangu, ligongo ngakuleka ndamo syawo syakusakala, ni ngakumjogopa Mlungu.

²⁰ Mjangu jwatambasukwile mkono wakwe kuti ŵapute acambusanga ŵawo, ŵakasile cilanga* cakwe.

²¹ Maloŵe gakwe galiji gakusalala mpela mawuta ga batala, nambo mu mtima mwakwe mwaliji mwana ngondo, maloŵe gakwe galiji gakoloŵa kugapunda mawuta, nambo ŵakwete upanga weswekuleswekule.

²² Mwatulile AMBUJE msigo wa yakudandawula yenu, ni Jwalakwe tacimcenjela, ngasakunda kose kuti mundu jwawo jwagoloka, atenganyice.

²³ Nambo Ŵalakwe Mlungu tacaponya amagongo ŵangu mwicenje lyakusokoka; ŵandu ŵakuwulaga acimjawo, ni ŵa unami, taciwa citema mkanacekulupe. Nambo une tinjakulupilila ŵalakwe kungulupusya une.