Masalimo 54 - Chiyawo Bible

Akuŵenda kuti ŵacinjilicisye

Kwa jwakwimbisya nyimbo. Ndakatulo ja Daudi jakwimbila yida yakwimbila ya ngonji. Asifi ŵaliji ali amsalile kala Saulo kuti, “Daudi ayice kukuŵa kumangwetu.”

¹ Asunje une ni macili gawo, ŵalakwe Mlungu ambe mtendele ni macili gawo,

² Ŵalakwe Mlungu, apikane lipopelo lyangu, apikane maloŵe ga pakamwa pangu.

³ Pakuŵa ŵandu ŵakulikwesya anjimucile ŵandu ŵangalwe akuwusosa umi ŵangu, jemanjajo ngakuganicisya kose ya ŵalakwe Mlungu.

⁴ Ngumanyilila kuti, Mlungu ni ŵakusangamucisya. AMBUJE* ni ŵakuwucenjela umi wangu.

⁵ Tacawucisya amagongo ŵangu ni yakusakala. Tacajonanga jemanjajo, ligongo Mlungu ali jwakulupicika.

⁶ Tinjipeleka mbopesi kwa Ŵalakwe mwalulele, tinjatogolela, ŵalakwe AMBUJE, pakuŵa ŵalakwe ali ŵambone.

⁷ Angulupwisye myisawusyo yangu yosope, sangalele pakwawona amagongo ŵangu acilepelaga.