Masalimo 53 - Chiyawo Bible

Ya kusakala kwa ŵandu

Kwa jwakwimbisya nyimbo. Pakukuya wimbe wa nyimbo jakuti: Pa ulwele. Ndakatulo ja Daudi.

¹ Jwakuloŵela akusati mu mtima mwakwe, “Kwangali Mlungu.” Akusatenda yangalumbana ni yakunyalaya. Pangali ni jumo jose jwakusatenda yambone.

² Mlungu kwinaniko akwinamila pasi kwalola ŵandu, kuti alole ni mkaŵa apali jumo jose jwali jwalunda, jwele jwamkulambila jwalakwejo.

³ Nambo ŵandu wosope ali ŵasokonecele, ŵandu wosopewo ali ŵakusakala. Pangali atamose jumo jose jwakusatenda yambone, pangali ni jumo jose.

⁴ Ana ŵandu ŵakutenda yangalumbanaŵa ngakumanyilila? Pakwalyaga ŵandu ŵangu mpela mwakusalila mkate; soni ngakumpopela Mlungu?

⁵ Nambo tacitenda woga, woga wakwe wele wanganiwuwonece. Pakuŵa Mlungu tacajonanga amagongo ŵenu, tisicatenda soni ligongo lyakuti Mlungu ŵakanile.

⁶ Ngupopela kuti cikulupusyo ca Isalaeli cityocele ku Siyoni!* Pitacipocela ŵandu cipanje cawo kutyocela kwa Mlungu, Yakobo* taciŵa ŵakondwa ni Isalaeli tacisangalala.