Masalimo 52 - Chiyawo Bible

Ya cilango ca Mlungu ni umbone wakwe mtima

Kwa jwakwimbisya nyimbo. Ndakatulo ja Daudi. Doegi jwa ku Edomu ŵaliji ali amsalile Saulo kuti, “Daudi apite kwa Ahimeleki.”

¹ Ligongo cici mkupoka ni masengo genu gakusakala m'mwe mundu jwamacili? Canasa ca Mlungu cili cangamala.

² Lisiku lyosope mkusaganicisya ya kwajonanga ŵane. Lulumi lwenu luli mpela lwembe lwakutema, masengo genu gali gakunyenga.

³ Mkusayinonyela yangalumbana kulekangana ni yambone, ni mkusanonyela kulambusya kulekangana ni kuŵeceta yakuwona.

⁴ Mkusanonyela kuŵeceta maloŵe gakwasawusya ŵane, m'mwe ŵa lulumi lwa unami.

⁵ Nambo Mlungu tacimswanya kwangaleceka, tacimtyosya ni kumkoposya kusa kwa nyumba jenu, tacimcuŵa mcilambo ca ŵandu ŵacijumi.

⁶ Ŵandu ŵagoloka taciyiwona yeleyi ni tacitenda woga, tacimseka acitiji,

⁷ “Mumlole mundu jwangasaka kutilila kwa Mlungu, nambo ŵakulupilile winji wa cipanje cakwe, ŵalimbicile kutenda yakusakala.”

⁸ Nambo une ndili mpela citela caciŵisi ca Olifi m'Nyumba ja AMBUJE,* ngusakulupilila cinonyelo cangamala ca Mlungu ndaŵi syosope.

⁹ Tinjatogolela ŵalakwe Mlungu kwa yaka yosope, kwa ligongo lya yayitesile, ni tinjalumba ŵalakwe pameso pa ŵandu ŵakwanonyela ŵalakwe. Tinjilalicila kuti ŵalakwe ali ŵambone.