Masalimo 51 - Chiyawo Bible

Lipopelo lyakuŵenda cikululuko

Kwa jwakwimbisya nyimbo. Salimo ja Daudi. Jwakulocesya Natani ŵaliji ali amjamwice jwalakweju ligongo lyakugonana ni Betisheba.

¹ Andendele canasa, ŵalakwe Mlungu, ligongo lya cinonyelo cawo cangamala, asimasye yakulemwa yangu ligongo lya canasa cawo cacikulungwa.

² Anjojesye kusyene pakutyosya ungalumbana wangu, aswejesye une pakundyosya yakulemwa yangu.

³ Pakuŵa yakulemwa yangu nguyimanyilila kulemwa kwangu kuli pa une ndaŵi syosope.

⁴ Nalemwecesye Ŵalakwe, Ŵalakwe jika; ndesile cangalumbana pameso pawo, apakombwele pakungolanga une kuti jwakulemwa, nginalemwa pakulamula magambo gangu mwakulungamika.

⁵ Ngumanyilila kuti, napagwile mu ulemwa,* ni natemi jwakulemwa kutandilila mcitumbo ca mama ŵangu.

⁶ Ngumanyilila kuti, ŵalakwe akusawunonyela mtima wambone; myoyo anjiganye lunda lwawo mkati mwa mtima wangu.

⁷ Aswejesye ni hisope* ni timbe jwamswela anjojesye ni tiswejele mbee kugapunda utandi.

⁸ Angumbasye une ni kusengwa ni kusecelela, agakunde kuti mawupa giŵagatemangwile gala gasecelele.

⁹ Akayilolecesya yakulemwa yangu, ni asimasye yakusakala yangu yosope.

¹⁰ Ambanganicisye une mtima weswela, conde Mlungu, aŵice mwa une mtima wasambano ni wakutamilicika.

¹¹ Akasanjasa une pameso pawo, akatyosya kwa une Msimu wawo weswela.

¹² Ambucisye soni une kusengwa kwa ukulupusyo wawo, alimbisye kuti mbe ni mtima wakwapikanicisya.

¹³ Tinjajiganya ŵandu ŵakulemwa matala gawo, ni taciwujila kwa ŵalakwe.

¹⁴ Angululucile une ku magambo gangu gakoposya miasi, Mlungu, ŵalakwe ali Mlungu ni Mkulupusyo jwangu, ni tinjikwesya maloŵe pakwimba ya kulungamika kwawo.

¹⁵ AMBUJE,* awugule ngomo syangu, ni pakamwa pangu tipaciŵeceta yakwalumba ŵalakwe.

¹⁶ Ŵalakwe ngakusangalala ni mbopesi, atamose ngapelece mbopesi jakoca, ŵalakwe ngimkanasangalala najo.

¹⁷ Nambo mbopesi jakusapocela ŵalakwe Mlungu, jili mtima wekasice, mtima wacanasa ni wakwiticisya ulemwa, ŵalakwe Mlungu ngasawucembulusya.

¹⁸ Ŵatendele yambone ŵandu ŵa ku Siyoni* ligongo lya mtima ŵawo wambone, ataŵe soni mapupa ga Yelusalemu.

¹⁹ Pelepo ŵalakwe tacisecelela ni mbopesi syakwenela, mbopesi syakoca ni syakoca syambumbu, ni tacipeleka ng'ombe sya mikambako pacanya pa malo gakupelecela mbopesi gawo.