Masalimo 50 - Chiyawo Bible

Kulambila kusyesyene

Salimo ja Asafu.

¹ Mlungu, AMBUJE* Mlungu Jwamacili, akuŵeceta kuti, akwaŵilanga ŵandu ŵa cilambo cosope capasi, kutyocela kungopoko lyuŵa mpaka kungapilo.

² Mlungu akunyesima kutyocela mu msinda wa Siyoni,* msinda ŵakwe wakusalala kusyesyene.

³ Mlungu jwetu akwisa, ngakutama jii, msogolo mwakwe mukolela moto wa ukali, mbungo jamacili jimsyungulile Jwalakwe.

⁴ Mlungu akutesile kwinani ni cilambo capasi; kuti yitendele umboni pakwalamula ŵandu ŵawo.

⁵ Jwalakwe akuti, “Mwasonganye ŵandu ŵangu ŵakulupicika ŵiŵatesile cilanga* ni une pakupeleka mbopesi.”

⁶ Yakwinani yikulalicila umbone wa wawo Mlungu, pakuŵa Mlungu msyene ali jwakulamula.

⁷ “Mpikane ŵandu ŵangu, tinjiŵeceta; tinjipeleka umboni wakumgomeka jemanja Aisilayeli. Une ndili Mlungu, Mlungu jwenu.

⁸ Ngangumjamuka ligongo lya mbopesi syenu, ni mbopesi syenu syakoca simkusimundajila ndaŵi syosope.

⁹ Ngisingunda kupocela ng'ombe kutyocela kwa jemanja, atamose mbusi sya mikambako kutyocela m'macinga mwenu.

¹⁰ Pakuŵa yinyama yosope ya mu ukweti yili yangu, pampepe ni ngo'mbe syasili m'matumbi.

¹¹ Nguyimanyilila yijuni yosope yayili mwipananga; ni yacijumi yosope yayikwenda kwitinji yili yangu.

¹² “Yikaŵeje kuti ndili ni sala ngininimsalila, pakuŵa cilambo cosope ni yosope yayili mwelemo yili yangu.

¹³ Ana ngusindya nyama ja ng'ombe; kapena kumwa miasi ja mbusi?

¹⁴ Nambo mpelece kwa Mlungu, mbopesi syenu syakutogolela; ni mtende yimwalumbile kwa Ŵakwinani Mnope.

¹⁵ Mumbilanje une pa ndaŵi ja yisawusyo. Une tinjimkulupusya, ni timcinjimbicisya.”

¹⁶ Nambo kwa mundu jwakusakala, Mlungu akusati, “Mkulisawucisya cici kugasala mwakuwilisyawilisya malamusi gangu? Ligongo cici mkuŵeceta ya cilanga cangu ni pakamwa penu?

¹⁷ Pakuŵa m'mwejo mkukana kumjiganya, ni mkusagaponya ku ndungu maloŵe gangu.

¹⁸ Pakumbona jwawiyi mkuŵa m'mbusanga jwakwe; ni mkusajenda ni ŵandu ŵacikululu.

¹⁹ “Mkusaŵeceta yangalumbana pakamwa penu, ni lulumi lwenu lukusapeka ya unami.

²⁰ Mkutama pasi, ni kumlambucisya mlongo mjenu ya unami ni kuŵeceta ya misece ya mlongo mjenu jusyesyene.

²¹ M'mwejo mtesile yele yinduyi, nambo une ngwamba kutama jii, mkuganisya kuti une ngulandana ni m'mwejo, nambo sambano ngumjamuka ni kumlosya yimtesile.

²² “Myilolecesye cenene yeleyi, jemanja ŵimkumliŵalila Mlungu, ngupakombola kumpaculanya nipo pangali ŵitamkulupusye.

²³ Nambo mundu jwakusapeleka mtima wakwe ŵakutogolela akunjimbicisya une; jwele jwakwenda matala gambone, tinjimlosya cikulupusyo cangu.”