Masalimo 5 - Chiyawo Bible

Lipopelo lyakuŵenda citetelo

Kwa jwakwimbisya nyimbo. Ajimbile yitolilo. Salimo ja Daudi.

¹ Agapikane maloŵe gangu, ŵalakwe AMBUJE* ni akupikane kuwuwula kwangu.

² Akupikane kulila kwangu, ŵalakwe Mlungu ni mwenye jwangu. Pakuŵa kwa ŵalakwe ngupopela.

³ Kundaŵipe ŵalakwe AMBUJE, akusagapikana maloŵe gangu. Ngusapopela kwa ŵalakwe, ni kulindilila kwanga kwawo.

⁴ Ŵalakwe nganaŵa Mlungu jwakusecelela yitendo yangalumbana; Ŵalakwe ngakucikunda cakusakala pameso pawo.

⁵ Ŵandu ŵakulikwesya ngasajima kose pameso pa ŵalakwe; ni kwaŵenga ŵandu wosope ŵakutenda yangalumbana.

⁶ Ŵalakwe akwajonanga wosope ŵa unami; Ŵalakwe akwanyosya ŵakuwulaga ŵandu ni ŵakwalambucisya ŵane.

⁷ Nambo ligongo lya winji wa cinonyelo cawo ngupakombola kwinjila m'Nyumba jawo; Ngukomboleka kwalambila ŵalakwe m'Nyumba jawo jeswela ni kwajinamila ŵalakwe mwa ucimbicimbi.

⁸ Alongolele une pasikati pa amagongo ŵangu, conde AMBUJE, agolosye litala lyawo kuti nalikuye.

⁹ Yakuŵeceta amagongo ŵangu yili yangakulupicika, maloŵe gawo gagumbele ni unami. Akwamba kusacilila kuŵeceta maloŵe gakuwulagasya.

¹⁰ Mlungu, ŵasawusye jemanjajo ligongo lya ulemwa* wawo, Malindi gawo gagwisye acimsyene. Ŵatopole jemanjajo pameso pa ŵalakwe, ligongo lya winji wa yakulemwa yawo ligongo ŵajimucilile ŵalakwe.

¹¹ Nambo asangalale wosope ŵakutilila kwa ŵalakwe apakombole ndaŵi syosope kwimba mwa lukondwa. Ŵacenjele ŵosope ŵakwanonyela ŵalakwe awe ŵakondwa mwa ŵalakwe.

¹² Ŵalakwe AMBUJE akwapa upile ŵandu ŵagoloka, Cinonyelo cawo ŵalakwe cikwacenjela mpela yakucijila.