Masalimo 49 - Chiyawo Bible

Kukulupilila cipanje kuli kuloŵela

Kwa jwakwimbisya nyimbo. Salimo ja ŵanace ŵa Kola.

¹ Mpikane ayi, ŵandu wa mitundu josope. Mtejele lipikanilo wosope ŵakutama pa cilambo capasi.

² Ŵandu ŵapenani ni ŵakutuluka ŵakwe, ŵakusicila ni ŵakulaga ŵakwe.

³ Pakamwa pangu tipaciŵeceta ya lunda; yaganisya ya mu mtima mwangu tiyiciŵa ya lunda.

⁴ Tinjitejela lipikanilo ku citagu,* tinjigopolela citaguco pakwimba cida cakwimbila ca ngonji.

⁵ Ngingogopa pa ndaŵi ja yisawusyo, pakusyungulila une ŵandu ŵakumbenga.

⁶ Ŵandu ŵamti myoyo akukulupilila cipanje cawo, akupoka ligongo akwete cipanje cacijinji.

⁷ Kusyene pangali mundu jwakuliwombola msyene, kapena kumpa Mlungu mtengo wa umi wakwe,

⁸ ligongo kumwombolela umi wa mundu kuli kwa mtengo mnope. Yele yitalipileyo ngayiŵa yakwanila

⁹ kuti atameje ni umi kwa yaka yosope, ngajawula ku malembe.

¹⁰ Jwalijose akulola kuti atamose ŵalunda akuwa, myoyo soni ŵakuloŵela ni wangali lunda ŵakwe. Wosopeŵa akusiŵalecela ŵane yipanje yawo.

¹¹ Ku malembe ni kumangwawo kwa kutama yaka yosope gali malo gakutama ŵandu ŵitacipagwa msogolo, atamose kuti piŵaliji cijumi yilambo yapikanikaga ni mena gawo.

¹² Atamose mundu aŵe jwakusicila camtuli, taciwa mpela yinyama yamwitinji.

¹³ Mlole yayikusiyatendecekwela ŵele ŵakusalikulupilila acimsyenepe mbesi ja ŵandu ŵakusaganicisya ya cipanje cawo.

¹⁴ Akwenela kwawula ku malembe mpela ngondolo, ciwa ticiciŵa mkucinga jwawo. Ŵandu ŵagoloka tacapunda jemanjajo pa ndaŵi jele yilu ya ŵandu ŵakusakala yili mkuwola, ku malembe tikuciŵa kumangwawo.

¹⁵ Nambo Mlungu taciwukulupusya umi wangu kutyocela ku macili ga ciwa.

¹⁶ Mkalaga mu mtima pimkumwona mundu jwine ali mkusicila, pacikutupa cipanje m'nyumba mwakwe.

¹⁷ Pakuŵa mundujo pati awile, ngasajigala kandu, cipanje cakwe ngasicilongana pampepe najo.

¹⁸ Atamose mundujo ali cijumi akusalitenda msyene kuti ali pambone, atamose alumbidwe pele payikumjendela yindu cenene,

¹⁹ jwelejo taciwape ni kuja kuwonegana nawo acinangolo wakwe wosope ku malembe, kweleko ngasaliwona lilanguka kwa yaka yosope.

²⁰ Atamose mundu aŵe jwakusicila camtuli, taciwape mpela yinyama ya mwitinji.