Masalimo 48 - Chiyawo Bible

Ya Siyoni msinda wa Mlungu

Nyimbo. Salimo ja ŵanace ŵa Kola.

¹ AMBUJE* ali ŵakulungwa, ŵakwenela kwalumba mnope, mu msinda wa Mlungu jwetu, petumbi lyakwe lyeswela.

² Litumbi lya Siyoni,* utame wakwe uli wakusalala, ukusangalalisya pa cilambo cosope capasi. Litumbi lya Siyoni lyalili kumpoto, lili msinda wa mwenye jwamkulungwa.

³ Mlungu alosisye kuti ni jwali jwakuwucenjela wele msindawo, ligongo akutama mkati mwakwe.

⁴ Ayimwene ŵasongangene, ŵasosile kuwutaga ngondo msindawo pampepe.

⁵ Piŵawuweni msindawo ŵasimonjile, ni kutenda woga ni ŵatisile cinam'balala.

⁶ Ŵatetemele kwakogoya ni ŵaweni kupweteka, mpela jwamkongwe jwakulaga pa ndaŵi jakuŵeleka,

⁷ mpela mbungo jamacili mujapasulile yombo.

⁸ Mpela mutwapikanile, twayiweni myoyo mu msinda wa AMBUJE Ŵamaciligosope, niwo msinda wa AMBUJE jwetu, uŵawutamice mpaka yaka yosope.

⁹ Tukusaganicisya ya cinonyelo cawo cangamala; tuli tutemi m'Nyumba, ŵalakwe Mlungu.

¹⁰ Ŵandu akwalumba, ŵalakwe Mlungu palipose; mpela mulipikanicile lina lyawo, Ŵalakwe akusalamula mwacilungamo;

¹¹ Ŵandu ŵakutama mu Siyoni asangalale. Ŵandu ŵa ku Yuda asecelele ligongo lya kulamula kwawo kwagoloka.

¹² Ŵandu ŵa Mlungu, msyungulile mu msinda wa Siyoni wosope, ni mŵalanje sanja syakwe;

¹³ mlolecesye cenene mapupa gakwe, ni mgalolecesye cenene malo gakwe gakulicinjilicisya, kuti timpakombole kwasalila ŵanace ŵakupagwa msogolo.

¹⁴ Timcasalila kuti, “Mlunguju ali Mlungu mpaka kalakala. Tacitulongolela uwe kwa yaka yosope.”