Masalimo 46 - Chiyawo Bible

Mlungu ali ni uwe

Kwa jwakwimbisya nyimbo. Salimo ja ŵanace ŵa Kola. Nyimbo.

¹ Kwa Mlungu ni kwakutilila kwetu ni macili getu, ŵakutukamucisya pa ndaŵi ja yisawusyo.

² Ni ligongo lyakwe ngasitujogopa atamose cilambo capasi cigalawuce, atamose matumbi gagwile mkati mwa nyasa,

³ atamose nyasa jilindime ni kutenda mkokomo, atamose matumbi gatetemele ni kulindima kwakwe kwa nyasa.

⁴ Lupali lusulo lwana tusulo twa mwana, tukusangalasya msinda ŵa Mlungu, malo gamaswela gakutama Ŵakwinani Mnope.

⁵ Mlungu ali mkati mwa msindawo, ngasiwujonasika kose. Mlungu taciwukamucisya kundaŵi.

⁶ Ŵa mitundu akutetemela mnope, ucimwene ukutenganyika, Mlungu naga aŵecete maloŵe, cilambo capasi cikusanyelenyenduka.

⁷ AMBUJE* Ŵamaciligosope ali pampepe ni uwe, Mlungu jwa Yakobo* ni kwakutilila kwetu.

⁸ Myice, mgalole masengo gawo AMBUJE,* yatite pakucisyusya cilambo capasi kuŵa masame.

⁹ Akulekasya ngondo mpaka kumbesi kwa cilambo capasi, akutemanya ukunje, kuposokolanya lipanga, akusajoca mageleta ga ngondo ni moto.

¹⁰ “Mjile jii, ni m'manyilile kuti ndili Mlungu. Mitundu ja ŵandu jikunjimbicisya, ŵa mcilambo capasi akulumba.”

¹¹ AMBUJE Ŵamaciligosope ali pampepe ni uwe, Mlungu jwa Yakobo ni kwakutilila kwetu.