Masalimo 45 - Chiyawo Bible

Nyimbo ja pa ukwati wa mwenye

Kwa jwakwimbisya nyimbo. Pakukuya wimbe wa nyimbo jakuti: Akakombo. Ndakatulo ja ŵanace ŵa Kola. Nyimbo ja pa ukwati.

¹ Mtima ŵangu ugumbele ni ngani jambone; ngwajimbila mwenye nyimbo jangu. Lulumi lwangu luli mpela cakulembela ca mundu jwakumanyilila kulemba.

² Ŵalakwe ali ŵakusalala mnope kwapunda ŵandu ŵane wosope; pakamwa pawo pakukopoka yambone, ni ligongo lyakwe Mlungu ŵapele upile mpaka yaka yosope.

³ Ŵalakwe ali jwa ngondo jwamacili mnope, ataŵilile upanga mciwunu mwawo, mu lumbili ni ukulu wawo.

⁴ Ajawule ni lumbili lwawo; ni kwapunda amagongo ŵawo wosope, akayicenjele yayili ya kuwona ni yagoloka. Mkono wawo wamlyo ukalosye masengo gawo gakogoya.

⁵ Mipamba jawo jakutema, jikusoma m'mitima mwa amagongo ŵa mwenye. Mitundu ja ŵandu jikusagwa pasi pameso pa ŵalakwe.

⁶ Citengu cawo ca ucimwene, ŵalakwe Mlungu, cili yaka yosope, simbo ja ucimwene wawo jikulosya kuti akusiŵalamulila ŵandu wawo mwakulungamika.

⁷ Ŵalakwe akusacinonyela cilungamo ni kuŵengana ni yakusakala, ni ligongo lyakwe Mlungu, jwali Mlungu jwenu, amsagwile, ampungulile m'mwejo ni mawuta ni kumsangalasya, kwapunda acimjenu wosope.

⁸ Yakuwala yenu yikununjila mawuta ga mule.* Nyumba syawo sya ucimwene sitaŵidwe ni msengo wa ndembo. Mwelemo nyimbo syakwimbidwa ni yida yakwimbila ya ngonji yikwasengwasya ŵalakwe.

⁹ Ŵanace ŵa acakongwe ŵa ayimwene ali mwikuga lya mbumba syenu syakucimbicika; ku mkono wenu wamlyo ajimi ŵamkwawo mwenye, ali awete yakuwala ya golidi* jwambone jwakutyocela ku Ofili.

¹⁰ Mpikane, mwanace jwamkongwemwe, ni mtejele lipikanilo lyenu; mwaliŵalile acalongo ajenu ni soni nyumba ja atati ŵenu.

¹¹ Mwenye tamnonyele ligongo lya kusalala kwenu; mwajinamile ligongo ali ambuje ŵenu.

¹² Ŵandu ŵa ku Taya tacimnyenjelela ni mituka jawo, ŵakusicila ni cipanje cawo ca mitundumitundu.

¹³ Mwanace jwamkongwe jwa mwenye ali m'nyumba mwakwe; awete yakuwala yakwe yayiluce ni litonji lya golidi.

¹⁴ Akwawula najo kwa mwenye ali awete nguwo sya maluŵa; pampepe ni aciŵali acimjakwe ŵakumpecesya.

¹⁵ Akumpecesya ali ŵakondwa ni kusangalala; pakwinjila ku cimbundi ca mwenye.

¹⁶ Yisukulu yenu tiyicijinjila m'malo mwa acinangolo ŵenu, timcatenda jemanjajo ayimwene pa cilambo cosope capasi.

¹⁷ Tinjiyikumbusya yisukulu ni yisukulu ya m'mawuja kuti akaliliŵalila lina lyawo, myoyo ngosyo sya ŵandu tisicalumba ŵalakwe kwa yaka yosope.